Hillary Clinton tikippoq
Hillary Clinton, siornatigut USAp præsidentiata nulia maannalu nunanut allanut ministeriusoq Nuup mittarfianut tikippoq nalunaaqutaq 19.47.
Clintonimut niuffiortut inuit hundredet arlaqarput, taannalu USAmi nunanut allanut minsteriusartuni siullersaalluni Issittumi siunnersuisooqatigiit ataatsimiinnerani peqataassaaq.
Hillary Clinton mittarfimmut pigami isumannaallisaanermi sulisunit unngunneqarsimavoq, taamaattorli niuffiortunut piffissaqalaarpoq arlallillu assammilugit ilassivai.
- Nuannaarutigaara takkukkassi, niuffiortorpassuarnut Hillary Clinton taama oqarpoq.
Ullaakkut radioaviisini annerusumik tusagaqarsinnaavusi.