Hillary Clinton suli ilungersorpoq
Arfininngornerup sapaatillu unnuaani demokratit malittarisassanut ataatsimiititaliaata aalajangiuppaa, nunap immikkoortuini marlunni, tassa Floridami aamma Michiganimi sinniisuutitat affaat partip ataatsimeersuarnerani taasisinnaatinneqassasut.
Nunap immikkoortuini pineqartuni marluusuni sinniisut taasisinnaatitaanertik annaagaluarpaat, tassa partip malittarisassai unioqqutillugit, præsidentimut qinigassanngortinniulluni qinersinermi partip ulluliussaa malinnagu qinersisitsisimanertik pissutigalugu.
Qinigassanngortinniulluni qinersinerit nunap immikkoortuini taakkunani marlunni partip ataatsimeersuarnerani ilanngullugit kisinneqarnissaat Hillary Clintonip piumasaraa, taakkunanimi ajugaasuugami. Maannalu ilanngullugit kisinneqassapput, kisianni tassa affaannai.
Alaatsinaattut oqaatigaat taama aaqqiisoqassappat Hillary Clintonip periarfissani nungussagai.
Præsidentimut qinigassanngortinniulluni qinersinissat kingulliit pingasut ullumi marlunngorpallu pisussaapput. Tassa nunap immikkoortui qinersiffigineqartussat tassaallutik Puerto Rico aamma nunap immikkoortui innuttakinnerusut South Dakota aamma Montana.
