Hillary Clinton Obamamik tapersersuilluinnarpoq

USA-mi præsidentinngorniunneq sioqqullugu qinerseqattaarnerni demokratit sassartitaasa ilaat Hillary Clinton Barack Obamamut ajorsaraluartoq tamanna maanna puigorneqarsinnaassagunarpoq.
Allattoq Mads Lynge
aggustip 27-at 2008 06:20

Demokratimmi USA-mi naalagaaffimmi Coloradomi Denverimi ataatsimeersuarneranni Clinton ippassaq unnukkut oqalugiarpoq, Barack Obamamillu tapersersuilluinnarnini Hillary Clintonip oqariartuutigaa.

Ataatsimeersuariaqataasut tamanna tusasannarlugulu Clinton pattaappaat:

- Barack Obama uanga qinerniarpara, USA-milu præsidentinngortariaqarpoq, demokratit akornanni avissaartuunneq aaqqiiviginiarlugu Clinton oqarpoq.

Clinton aamma Obama upernaaq manna illuatungeriillutik qineqqusaarput, ilaatigullu sakkortuumik oqaaseqartarsimallutik.

Hillary Clintonimik taasisimasut ilaasa Barack Obamamik qinersinissartik suli nangaassutigivaat, siornatigulli pisimasut puigorlugit Obamamik qinersinissaat Clintonip oqalugiarnermini oqariartuutigavaa.

Novembarip sisamaanni USA-mi præsidentissamut qinersisoqassaaq.