Hillary Clinton Kalaallit Nunaaliassaaq

(Nutartigaq nal. 17:00)

Hillary Clinton Nuummut, qaammatip tulliani, tikissaaq. Tamanna Inatsisartuni folketingimilu ilaasortamit, Juliane Henningsenimit uppernarsarneqarpoq.

-  USA-minngaaniit Hillary Clinton ataatsimiinermi peqataassaaq. Ataatsimiinnermi aamma peqataassapput, nunanut allanut ministerit arlallit. Taamaattumik una pisussaq, nunarsuarmioqatitsinnit maluginiarneqartussaassaaq, Juliane Henningsen oqarpoq.

USA-mi nunanut allanut ministeri Hillary Clinton, Issittumi Siunnersuisoqatigiit, arfineq aappaassaanik ataatsimiinissaannut atatillugu qaammatip tulliani maajip aqqaneq aappaani Nuummiisaaq.

Ataatsimiinermi peqataassapput ilaatigut: Ruslandimiit Sergej Lavrov; Danmarkimi nunanut allanut Ministeri Lene Espersen aamma nunatsinni Naalakkersuisut siulittaasuat Kuupik Kleist.

Nunanut allanut ministerit Nuummut tikinnissaat, Politiinittaaq aamma uppernarsarneqarpoq.

- Paasitinneqarpugut nunanut allanut ministerit arfineq pingasut, Issittumi Siunnersuisoqatigiit ataatsimiinissaanni, maajip aqqaneq aappaani pisussami peqataassasut. Politiiniit piareersaateqalereerpugut, ataatsimeeqqataasut ajunngitsumik paarineqarnissaanut ataatsimiinissallu ajunngitsumik naammassineqarnissaa pillugu,  chefpolitiinspektøri Jesper Kracht oqarpoq.
Taama nuimatigisunik maanga nunamut tikittoqassatillugu, sillimaniarneq pingaaruteqartartoq chefpolitiinspektørimit Jesper Kracht-imit oqaatigineqarpoq.

- Taama nuimatigisunik, tassa nunanut allanut Ministerinik tikittoqarnissaa, Politiiniit sillimaniarnerup tungaatigut annertuumik piumasaqaateqartarpoq.