Hillary Clinton ippassaq pakatsivoq

Demokratit sinnerlugit præsidentinngorniunnermi Hillary Clintonip neriulluarnera ippassaq aamma ajalusoorpoq. Qineqqusaarnermi Barack Obama siullerpaamik ippassaq ullormi pingaaruteqaqisumi, aalajangiisuulluarsinnaasumilu, amerlanerussuteqalaarpoq.
maajip 11-at 2008 17:15

Obamamik tapersersuiniartut nutaat pingasut ippassaq nalunaarput, taakkunannga ataatsip Clinton tapersersorsimagaluarpaa. Taamaalilluni nuimasut 273-it Obamamik tapersersuilerput, Clintonimik tapersersuisut 272-iullutik.

Obama-p North Caroline-imi amerlanerussuteqarluarnera, qineqqusaartullu Indianami imminnut qaninniararsuat pissutigalugu, Obamamik illersuisut amerliallapput.

-Qineqqusaarneq qanoq inerneqassanersoq qularnarunnaarpoq, qineqqusaartorlu ataasiinnaq katersuuffigisariaqalerparput. Obama-p parteerput nunarpullu katersorsinnaalluarpaa, Barack Obamamik illersuisut nuimasut ilaat, Obamamik tapersersuilluni tallimanngormalli saqqummersoq, Californiameersoq, Edward Espinoza, oqarpoq. Nuimasut ikinnerpaamik qulit Obamamik maanna tapersersuipput.