Hillary Clinton apeqqarissaarfigineqarpoq

Washingtonimi inatsisartut nunanut allanut ataatsimiititaliaani Hillary Clinton ualigaa apeqqarissaarfigineqarpoq. USA-mi naalakkersuisussatut toqqarneqartut akuerineqannginneranni taamatut apeqqarissaartarneq ileqquuvoq. Hillary Clintonilu Nunanut Allanut naalakkersuisussatut toqqarneqareerpoq.
Allattoq Mads Lynge
januaarip 13-at 2009 17:55

PIP Naalagaaffiit akaareqatigisavut amerlisartariaqarpavut akeqqavullu ikilisartariaqarlutigit. Nunarsuatsinni ajornartorsiutit Amerikap kisimi iluarsisinnaanngilai, Amerikalu tapersersuinngippat nunarsuatsinni ajornartorsiutit aaqqinneqarsinnaanngillat, Hillary Clinton nunanut allanut politikkeriniakkaminik saqqummiussinermini ilaatigut oqarpoq. Hillary Clintonip saqqummiinermini aamma oqarpoq Amerikamiut torersumik naalakkersuisutigut isumaqatigiinninniartarneq, ilaatigulli aamma sakkulersorluni kiisalu niuernikkut politikkerisat atorlugit ajornartorsiutinik qaangiiniartariaqartoq. Sakkulersorluni aaqqiiniarneq atorniartillugu eqqissineqarsinnaanera qatangiinnartinnaveersaassavarput. Taamaammat suliniutit nutaat aallartisarlugit ajornartorsiutinik qaangiiniarnissaq anguniassallugu, Hillary Clinton oqarpoq. Hillary Clintonip naalakkersuisoqatigiligassanilu politikkerisartik qanoq piviusunngortinniassaneraat pissangassutigineqarpoq. Soorlu kangiani qiterlermi akersuunnerit pillugit oqarpoq, Israelimi isumannaallisaanissaq tapersersortariaqartoq, illuatungaatigulli aamma Palæstinamiut siunissami inatsisinik naapertuilluarlutik naalakkersuinikkut aningaasaqarniarnikkullu naalagaaffittut ingerlalernissamut neriuutaat tapersersorneqartariaqartut. Taamatulli oqareerluni qanoq isummat piviusunngortinniassaneraat pissangassutigineqarpoq. Apeqqutaavormi Hillary Clinton nammineq qanoq tunniusimatigaluni pissutsinik aaqqiiniaqataassanersoq, Obamalu præsidentitut qanoq suliniutaasussanut akuliusimatigissava. Irakimi Afghanistanimilu sorsunnernut atatillugu naluneqanngilaq, Irakimiit sakkutuut tamarmik angerlartinneqarnissaat aalajangiusimaneqartoq, Afghanistanimilu sakkutuut amerlineqartariaqartut. Afghanistanimili ajornartorsiutit sakkulersornerinnakkut aaqqinneqarsinnaanngitsut nassuerutigaat, taamaammallu sanaartuinermi ikiuunnikkut inuiaqatigiillu akornanni toqqissisaanikkut naalagaaffimmi pissutsit iluarsiniartariaqartut.

Hillary Clintonip apeqqarissaarfigineqarnerata kingorna, Danmarkip Radioanut ilanngutassiortup, Steffen Gramip oqaatigaa, Hillary Clintonip naalakkersuisussatut akuerineqanngitsoornissaanut peqqutaasinnaasunik eqqaasaqarsinnaanani.