Herstedvesterip pisortaa tunuartoq

Paarnaarussat paarnaarussivinniit qimaasartut tusartarpagut, maannakkulli Danmarkimi parnaarussivinni sulisut qimarrattutut taaneqarsinnaapput.
Allattoq Elisa Isaksen
novembarip 26-at 2007 17:37

Parnaarussivinni sulisut soraararnerannut pissutaapput sulisut peqqarniitsortaasa ilaminnik naqisimanninniarnerat.

Ippassigami Jyllandip kangiani paarnaarussivimmi ajornartorsiutaasoq paasineqarpoq, Herstedvesterimili paarnaarussivimmi aamma ajornartorsiutaasoq ullumi saqqummiunneqarpoq.

Herstedvesterimi, kalaallit 20-t killilerneqanngitsumik paarnaarussaaqqaffianni pissutsit maanna Naalagaafiup unnerluussisuanit misissorneqartussanngorput. Sulisut ilaasa peqqarniitsut suleriaasaat pissutigalugit paarnaarussiviup pisortaa sulisullu qaffasissumik atorfillit arlallit soraarnerisa kingorna misissuisoqarnialerpoq.

Herstedvesterimi pissutsinik nalunnginnittut Radioaviisimut oqarput ajornartorsiut ilisarisinnaallugu.

- Pissutsinik nalunginnittut oqaluttuarput paanaarussivimmi sulisut ilaat peqqarniillutillu paanaarussanik, aamma kalaallinik nikaginnippaloqalutik oqaluttartut. Oqaatigineqarporli sulisut ikittuinnaat peqqarniitsutut taaneqarsinnaasut.

- Herstedvesterimi sulisorpassuit inussiarnersuupput, peqqarniitsulli pissaaneqarlutillu sunniuteqarsinnaaqaat, pissutsinik nalunnginnittut ilaat oqarpoq.

Inatsisinik Atortitsinermut ministeri, Lene Espersen Ritzauimut ullumi oqarpoq, Herstedvesterimi pissutsinik misissuinissaq tapersersorlugu.

- Ajornartorsiutit qulaajarniarpagut. Pinerlussimasunimmi Nakkutilliisoqarfimmi sulisut sulilluartut ajortisarneqarput, sulisut ikittuinnaat isornartulimmik sulinerisigut, ministeri oqarpoq, pissutsinillu nalunnginnittut tamarmik nalunngisaminnik oqaluttuarnissaat kaammattuutigalugu.

Herstedvesterimi pissutsit pillugit sulisut naammaginninnatik nalunaartarsimagaluartut, qangali qanoq iliuuseqarfigisimanngimmagit Lene Espersen isornartorsiorneqarpoq.

Maannalu tassa paarnaarussiviup pisortaa, arnaq pissutsit akuerisinnaannginnamigit suliffiminiit tunuarpoq.