Assi: IA

Herstedvesterimut utersinnaatitaanissamut pissutsit immikkut ittut atuuttariaqassapput

Immikkut paarisassanngortitaallutik pineqaatissinneqartut, parnaarussivimmiillu Herstedvester Fængselimit Nuummi pineqatissinneqarsimasunut inissiisarfittaassamut nuunneqartut, pissutsit immikkut illuinnartut atuutitsillugit aatsaat peqqissimisinnaatitaassaapput, Aaja Chemnitz Larsen taama isumaqarpoq.

Immikkut paarisassanngortitaallutik pineqaatissinneqartut, parnaarussivimmiillu Herstedvester Fængselimit Nuummi pineqatissinneqarsimasunut inissiisarfittaassamut nuunneqartut, pissutsit immikkut illuinnartut atuutitsillugit aatsaat peqqissimisinnaatitaassaapput, Aaja Chemnitz Larsen taama isumaqarpoq.

Kalaallit immikkut paarisassanngortitaallutik pineqaatissinneqartut Nuummi pineqaatissinneqarsimasunut inissiisarfittaassamut nuunneqarnissaminnik akuersisimasut, Danmarkimi parnaarussivimmut Herstedvester Fængselimut utersinnaatitaanissaat pissutsit immikkut illuinnartut atuutsillugit aatsaat pisinnaassaaq.

Folketingimut ilaasortaq Aaja Chemnitz Larsen, Inuit Ataqatigiit Inatsisartuni gruppiannik suliaq pillugu oqaloqateqarnermi kingorna taama isumaqarpoq.

- Taamatut pisoqassappat aalajangiinermi tunngavissaqartariaqarsoraara. Aamma Herstedvesterimit Nuummut nuunneqarnissaq toqqaraanni tamanna tunngaviatigut inaarutaasumik aalajangiinerusariaqarpoq. Taamatullu aalajangerneq eqqarsaatigilluagaasimasariaqarpoq, KNR-imut taama oqarpoq.

Ilaqutariit katsorsartinnissamullu neqeroorutit apeqqutaasinnaasut

Inatsisissatut siunnersuut naapertorlugu, Nuummi pineqaatissinneqarsimasunut inissiisarfittaassaq 2018-imi naammassineqarpat, kalaallit Herstedvester Fængselimut inissinneqarsimasut pillaatip sinnera Nunatsinni atussanerlugu nammineerlutik aalajangertussaavaat.

Inuttulli pisinnaatitaaffiit pillugit Nunatsinni siunnersuisoqatigiit aamma Inuttut pisinnaatitaaffiit pillugit Danmarkimi siunnersuisoqatigiit isumaqarput kalaallit immikkut paarisassanngortitaallutik pineqaatissinneqarsimasut Nuummut nuunneqarnerminnik peqqissimisinnaatitaanissaat piffissami killilikkami periarfissaasariaqartoq.

Nuunneqarnermi peqqarniissinnaavoq, aamma inuiaqatigiinni kalaallini pissutsit allanngorsimaqaat. Pingaartumillu Danmarkimi ukiorpassuarni parnaarussaaqqasunut tamanna atuuppoq, Siunnersuisoqatigiit taama isumaqarput. Aaja Chemnitz Larsenillu tamanna paasisinnaalluarpaa.

 - Taamatut aalajangiinissaq oqimaatsuussasoq paasisinnaavara, aammali isumaqarpunga periarfissap taassuma (Danmarkimut utersinnaatitaanissaq, aaqq.) pitsaanngitsumik atorneqannginnissaa pingaaruteqartoq.

Taamaammat isumaqarpoq Herstedvester Fængselimut utersinnaatitaanissaq immikkut paarisassanngortitaalluni pineqaatissinneqartumut tunngatillugu pissutsit immikkut illuinnartut atuutsillugit aatsaat periarfissaasariaqartoq.

- Pissutsit assigiinngitsut atuutissapput, soorlu ilaqutariinnermut tunngasut, ikorfartuisunut neqeroorutigineqartunullu. Neqerooruteqarnissaami (...) tamatta ilungersuutigaarput. Aamma aalajangernissamut tamakku pissutaaqataalluarsoraakka.

Pinerluttunik Isumaginnittoqarfiup aningaasaqarnera minnerusunngitsumillu pineqaatissinneqarsimasut pinerluutaannik eqqugaasimasut ilaatigut apeqqutaassasut aamma erseqqissaatigaa.

Peqqissimisinnaatitaanissamik siunnersuutigineqartoq Nunatsinni pinerluttulerinermi inatsisip allanngortinneqarnissaanik siunnersuummut inaarutaasumut - Inatsisartuni suliarineqareerpat Folketingimi suliarineqartussamut - ilaatinneqassanersoq suli nalunarallarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat