Herstedvesterimiittut utaqqisinneqarsimasut

Eqqartuussiveqarneq pillugu Ataatsimiititaliarsuup innersuussutissanik sivisuallaamik suliarinnissimanini ajuusaarnarpoq, Ataatsimiititaliarsuarmi ilaasortaq, Inuaqatigiilerinermi ilisimatooq Finn Breinholt Larsen DR-imit apersorneqarluni taama oqarpoq:

-Suliap naammassiniaasaarneqarsimanera ajuusaarutigaara, pingaartumik Herstedvesterimi parnaarussat eqqarsaatigalugit, taakkununngami oqitsuinnaanavianngilaq Danmarkimi parnaarussivimmiinneq, pingaartumik qallunaatut oqalussinnaanngikkaanni, Finn Breinholt Larsen oqarpoq.

Ataatsimiititaliarsuarmi sulineq aallartimmat, ilaasortat sulinissaat ukiunut pingasunut sisamanilluunniit naatsorsuunneqarpoq, piffissaliunneqartorlu taamanikkut naammagineqarsimavoq.

-Herstedvesterimut tunngatillugu suliakkiissutit ilimagisamit sivisunerujussuarmik ingerlanneqarput, ajuusaarutigaaralu Herstedvesterimiittut naammaginanngitsumik taama utaqqisinneqarujussuartinneqarsimammata, Finn Breinholt Larsen oqarpoq.