Herstedvesterimiittut pillugit suli nalorninartoqarpoq

Eqqartuussiveqarneq pillugu ataatsimiititaliarsuup suliaata killiffia iluarineqaraluartoq, paasinarsivoq kalaallit Herstedvesterimi parnaarussat nunatsinnut uterteqqinneqarnissaat suli nalorninartoq.

Inatsisinut atortitsinermut naalakkersuisup Tommy Marø-p ataatsimiinneq ima nalilerpaa:

- Ataatsimeersuarneq pitsaasutut imaqarluartutullu nalilerpara. Peqataasut qanoq oqariartuuteqassanersut pissanngatigisimaqaara, kisianni nipimik ataatsimik isorinnittumik tusaasaqanngilanga, Tommy Marø oqarpoq, nangillunilu:

- Isumaqarpunga naalakkersuisut inatsisartullu pissarsilluartut. Ukiami inatsisartut ataatsimiinneranni oqallisissanik peqarluarpoq, Tommy Marø naliliivoq.

Inatsisinik atortitsinermut naalakkersuisoq Tommy Marø taama oqarpoq.

Pinerlussimasunik isumaginnittoqarneq, nunatsinni matoqqasumik isertitsiveqarnissaq pineqaatissiisarnerillu pingaarnertut Katuami ullumi sammineqarput.

Danmarkimi inatsisinik atortitsinermut ministeri Lene Espersen oqarpoq eqqartuussiveqarneq pillugu oqallittoqartariaqartoq, tamannalu pitinnagu Namminersornerullutik Oqartussanit akissuteqaateqartoqarnissaa utaqqiumaarumaarini:

- Namminersornerullutik Oqartussat ataatsimiititaliarsuup innersuussutai tusarniaassutigeqqaassavaat, taamaaliortoqareerpallu siunnersuutit suut piviusunngortinneqarsinnaanersut aalajangerneqarumaarpoq, Lene Espersen oqarpoq.

Kalaallit Herstedvesterimi parnaarunnagit nunatsinni matoqqasumi isertitsivimmi parnaarunneqartalernissaat Lene Espersenip tapersersorpaa.

- Ataatsimeersuarnerulli ingerlanerani paasinarsivoq matoqqasumik parnaarussiveqalernissap aningaasalersorneqarnissaa ajornartorsiutaanngitsoq. Ajornartorsiut tassaavoq kikkut sulisuussanersut, katsorsaanerillu qanoq ingerlanneqartassanersut, Lene Espersen erseqqissaavoq.

Inunnik isumaginninnermik sulialik, ukiorpannilu Herstedvesterimiittunik sammisaqartarsimasoq, Tine Bryld, eqqartuussiveqarneq pillugu ataatsimiititaliarsuup suliaa naammaginartinnagu oqaaseqarpoq:

- Isumaqarpunga suliaq kigaappallaarsimasoq. Suliap ingerlanerani isumaliutissiissutinik saqqummersitsisoqartarsimasuuppat, kalaallit Herstedvesterimiittut sukkanerusumik aaqqiivigineqarsimasinnaassagaluarput, Tine Bryld oqarpoq.