Herstedvesterimiittut atugaannik missuisoqarpoq
Hverstedvesterimi kalaallit aalajangersimasumik piffissaligaanngitsumik paarnaarussat misissuiffigineqarnerata kingunerisaanik allannguisoqassagunarpoq. Misissuisuuvoq pinerluttut iliuuserisartagaallu pillugit immikkut ilisimasalik Københavnip Universitetiani inatsisileritooq Evy Frantzsen. Taassuma avisimi Politikkenimi allaaserisaq ukiualuit matuma siorna atuaramiuk paasilersimavaa inunnik taama atugaqartoqartoq.
- Allaaserisaq atuarakku assut tupaallaqaanga inunnik taama atugaqartoqartoq paasilerakku, Evy Frantzsen
Kalaallit pineqaatissinneqarsimasut 1979-imi Herstedvesterimukartinneqartalersimanerannik maanna misissuisoq oqarpoq.
Evy Frantzsenip Norgep avannaaneersup kalaallit Herstedvesterimukartinneqartarnerat nuannarinngilluinnarini isertuutinngilaa:
- Inuiaqatigiit ikittunnguit nammineerlunga peroriartorfigaakka pineqaatissinneqarsimasullu qanoq pineqartarneri qanimut taamaalillunga ilisimasaqarfigalugit. Nunagisaq qimallugu isertitsivimmiittussanngortinneqarneq namminermini artornareersoq suli ajornerussaaq tikiffigisat kulturiannik oqaasiinillu paasisaqarsinnaanani nammineq oqaaserisat atorlugit oqalukkaluarluni paasineqarsinnaannginneq. Taakkulu saniatigut ilaquttat ikinngutillu imaaliallaannaq pulaarsinnaanatik aqqutaa ungasillunilu akisoqimmat, Evy Frantzsen oqarpoq.
Kalaallit 21-t aalajangersimasumik piffissaligaanngitsumik Herstedvesterimiittussanngorlugit pineqaatinneqarsimanerat minnerunngitsumillu Herstedvesterimeereerlutik inuiaqatigiit akornanniilersimasut atugarisaat misissorneqassapput.
Evy Frantzsen isumaqarpoq kikkulluunniit toqutsisimanertik, pinngitsaaliisimanertik annersaasimanertillu peqqutigalugit nunaminnit anisitaasariaqanngitsut.
- Pinerluuteqarsimasummigooq iliuuserisimasatik paasileraangamikkik artorsaatigalugillu inuunermi sinnerani puujugassarineq ajorpaat, Evy Frantzsen erseqqissaavoq.
Evy Frantzsen misissuinerminut atatillugu nunatsinnukassaaq attuumassuteqartut tamaasa paasiniaaffigiartorlugit, novembarimilu naammassinissi neriuutigaa.
