Herstedvesterimiittup uterniarnerigalua itigartinneqarpoq

47-nik ukiulik Karl Eliassen sakkortuumik pinerluuteqarsimanini pillugu Herstedvesterimiittoq nunatsinnut uterniarnerigalua Nunatta Eqqartuussivianit ullumi itigartitsissutigineqarpoq.

Karl Eliassenip kissaateqarnini naapertorlugu nunatsinnut pinerluuteqarsimasunut inissiisarfimmut Aasiannut Ilulissanulluunnit nuutinneqarnissani kissaatigigaluarpaa.

Karl Eliassen eqqartuussinermi isiginnaarut atorlugu Københavimit peqataatinneqartoq ukiut sisamat Herstedvesterimeereersimavoq. Piffissaligaanngitsumillu pineqaatissinneqarnera allanngortinneqassanngitsoq Nunatta Eqqartuussiviannit ullumi aalajangerneqarpoq.

Karl Eliassen Aasianni pinerluuteqarsimasunut inissiisarfimmiitilluni pinerluuteqaqqissimammat nunatsinnullu uteqqikkaluaruni pinerluuteqaqqissinnaammat nunatsinnut uternissaa piffissaanngitsutut isigineqarluni itigartinneqarpoq.

Karl Eliassen sakkortuumik pinerluuteqarsimasutut Aasianni pinerluuteqarsimasunut inissiisarfimmiitinneqarpoq. 2001-imili inissiisarfimmiitilluni inooqamminut politiinullu siorasaarisimasutut toqutseriarsimasutullu ilaatigut eqqartuunneqarluni Hedstedvesterimi piffissaligaanngitsumik pineqaatissinneqaqqippoq.

Karl Eliassen marlunnik paarsisoqarluni ataasiaannarluni Herstedvesterimit aneersimavoq, qanittukkullu aatsaat tarnip pissusaanik ilisimasalimmik oqaloqateqartalersimalluni. Tamakku tunngavigalugit eqqartuussivik aalajangerpoq, Karl Eliassen nunatsinnut utissanngitsoq.

Karl Eliassenip eqqartuussinermi illersuisua, Gedion Jeremiassen Radioaviisimut oqarpoq, Nunatta Eqqartuussiviata aalajangiinera tusaatissatut tigullugu. Aammali nunatsinni matoqqasumik pinerluuteqarsimasunut inissiisarfimmik pilersitsinissamut isumaliutit aallarteqqinneqartariaqarnerarlugit.

Karl Eliassenip pinerluuteqarsimasunut inissiisarfimmut inissinneqarnissaminut kissaateqaqqinniaruni aappaagu qinnuteqaqqissinnaavoq.