Herstedvesterimiit nuukkusuppoq

34-inik ukiulik Abel Klemmensen, 1990-imi ukiortaanngortoq Narsami ikinngutiminik arfineq-marlunnik aallaallugit toqutsisoq, neriuppoq Herstedvesterimiit aasap ingerlanerani pinerlittaalisitsisut inissiisarfiisa ilaannut nuunneqarumaarluni, nunniortartutut betonilerisutullu sulinini nangisinnaajumallugu, AG juunip 20-ianni saqqummersoq taama allappoq.

Abel Klemmensen ukiut pingasut matuma siorna inissiaaqqami ineqarpoq.

Abel Klemmensenilli ikiaroornartumik pujortartarnera unnuakkullu illoqarfiliartarnera paasineqarmat erngerlugu Herstedvesterimut utertinneqarpoq.

Ishøjimi sulisitsisorisimasaata Abel Klemmensen nalunaarfigisimavaa pinerluttaalisitsisut inissiaataanni najugaqaleqqissagaluarpat suliffisaqartillugu, Jyllands-Postenimi tusagassiortoq allappoq.

Abel Klemmensen ukiut 16-it matuma siorna toqutsinini pillugu ima aviisimut oqarsimavoq:

- Pinerluutigisimasara eqqarsaatigiinnassagaluarukku sapissavara, imminut sequtsilertooqinaanga, taamaaliorusunngilangalu, 18-inik ukioqarluni toqutsisimasoq nunatsinnullu uteqqikkusunngitsoq Abel Klemmensen JyllandsPostenimut taama oqarsimavoq.