Herstedvesterimi parnaarussat kalaaleqatiminnik sulisussaaleqipput
Oqaatsitigut inuusaatsikkullu ajornartorsiuteqarneq pissutigalugit kalaallinut Herstedvesterimi parnaarussanut inuuneq oqitsuinnaanngilaq.
Parnaarussivimmi kalaallit immikkoortortaanni kalaallinik sulisoqanngilaq, tamannalu parnaarussat sulisullu akornanni paaseqatigiinniarnerannut ajornartorsiutaasoq pinerluuteqarsimasut nakkutilliisoqarfiata aviisianni ”Nyt fra Kriminalforsorgen”-imi kingullermi saqqummersumi atuarneqarsinnaavoq.
- Attaveqatigiinniarneq ajornartorsiutigisorujussuuarput, kalaallit sulisut pisariaqartippavut, qallunaat sulisut inuusaaserput naluaat, taama Herstedvesterimi ukiut pingajussaa parnaarussaaqqasoq oqarpoq.
Immikkoortortaqarfik 1980-kkut qiteqqunnerannili atulerpoq, taamanili kalaallit parnaarussat atugaat ajorneruleriartuinnarsimavoq.
- Aallarteqqaarneranut sanilliugu maluginiarpara tarnikkut atugassarititaasut ajornerulersimaneri, taama parnaarussivimmi atorfilik Flemming Martinsen oqarpoq.
Kalaallit parnaarussat atornerluinerat ajornartorsiutaanerpaavoq. Maannakkut Frederiksberg Centeri suleqatigalugu atornerluinermikkut katsorsarneqarnissaannik neqeroorfigineqartarput.
