Herstedvesterimi katsorsaaneq ingerlaannassanersoq nalilersorneqarpoq
Herstedvesterimi kalaallit paarnaarussat ukiut marluk matuma siorna ikiaroortumik atuisuunertik pillugu katsorsartissinnaalerput. Tappavani katsorsartittarneq Frederiksberg Centerip akisussaaffigaa. Herstedvesterimi katsorsaasarneq ingerlanneqaannassanersoq nalilersorniarlugu pineqaatissinneqarsimasunik nakkutilliisoqarfiup tallimanngorpat Frederiksberg Center ataatsimeeqatigissavaa. Katsorsaaviup namminersortup katsorsaaneq iluatsilluartutut nalilerpaa:
Frederiksberg Centerimi pisortap Morten Dalsgaardip Herstedvesterimi atugassarititaasut eqqarsaatigalugit katsorsaaneq iluatsilluartutut nalilerusuppaa. Herstedvesterimilu sulisut aamma ilalersuillutik.
- Katsorsariaaseq eqqortoq toqqarsimavarput. Ulluinnarni paarnaarussat pissusilersornerat ilorraap tungaanut saassimasoq malugisinnaavarput. Tamanna sulisuulluni nuannersuuvoq, isumaginninnermik siunnersorti aallaqqaataaniilli malinnaasoq Hannah Hagerup taama oqarpoq.
Kalaallit Herstedvesterimiittut 04´-mi ukiakkut katsorsartinnerat Frederiksberg Centerianit akisussaaffigineqarluni aallartippoq. 13-t katsorsartikkusullutik nalunaarput taakkualu affai katsorsartinnertik unitsissimavaat.
- Katsorsartittut tamarmik iluatsittumik atuisuujunnaarneq ajortut nalunngilara. Taamaammat katsorsartittut affaasa katsorsartikkunnaarsimanerat paasisinnaalluarpara. Taama matoqqatigisumi avataaniittunik attaveqarpiassanatillu pikkoreqaat atuiunnaarsinnaagamik, Morten Dalsgaard oqarpoq.
Nalinginnaasumik sapaatip akunneri arfinillit katsorsartittoqartarpoq katsorsartereeraannilu qaammatit arfineq-pingasut katsorsartinneq malitseqartinneqartarpoq. Herstedvesterimiittut sapaatip akunneranut pingasoriarlutik katsorsartittarput. Taamaalilluni nalinginnaasumik katsorsartinnermit allaanerulaarpoq.
Herstedvesterimiittut anigaangamik katsorsartereernerup kingorna malitseqartitsisarnerat nanginneqartarpoq. Herstedvesterimiittut katsorsartinneri katsorsaasup Maria Tausenip ima oqaluttuarai:
- Tunissutitut uannut tunniunneqarsimasutut misigisimavara. Paarnaarussat katsorsarlugit qujamasunnartorujussuuvoq. Neriuppungalu siunissami iluaqutaajumaartoq, Maria Tausen oqarpoq.
