Herstedvesterimi inissiisarfimmiittunut aningaasanik tunniussisoqarsinnaajunnaassasoq
Danmarkimimi parnaarussivinni matoqqasuni tamani parnaarussanut, kalaallit Herstedvesterimi inissiisarfimmiittut ilanngullugit, aningaasanik tunniussisarneq inatsisissatut siunnersuummi nutaami unitsinniarneqarpoq.
Danskit inatsisinik atuutsitsinermut ministereqarfiat tusagassiorfinnut nalunaaruteqarluni taama ilisimatitsivoq.
Parnaarussivinni matoqqasuni parnaarussanut qanigisaasut pulaarnerminnut atatillugu aningaasanik ullumikkut tunniussisinnaatitaapput. Aningaasalli pinerluttuliornikkut pissarsiarineqarsimasut taamaaliornikkut parnaarussivinnut eqqunneqarsinnaasut, danskit inatsisinik atuutitsinermut ministeriata, Søren Pape Poulsenip oqaatigaa, tamannalu unitsinniarneqarpoq.
- Periarfissaq taanna pinerluttuliortut kammalaatimik parnaarussaaqqanerat atornerlullugu aningaasanik pinerlunnermikkut pissarsiaminnik toqqorterinermut atorsinnaavaat. Taamaammat parnaarussivinni matoqqasuni Københavnimilu parnaarussivinni aningaasanik tunniussisarnerup inerteqqutigineratigut sukateriniarpugut.
Parnaarussivinni matoqqasuni parnaarussat nerisassanik allanillu pisariniaraangamik aningaasanngukkanik ullumikkut akiliineq ajorput.
Danskit inatsisinik atuutitsinermut ministeriata Søren Pape Poulsenip aaqqissuussineq nutaaq Folketingimi aasaanerani sulinngiffeqarneq sioqqullugu akuersissutigineqarsinnaassasoq neriuutigaa.
Aaqqissuussinerli Nunatsinni pinerluuteqarsimasunut inissiisarfinnut atuutitsinneqassanngitsoq, Pinerluttunik isumaginnittoqarfiup KNR-imut ilisimatitsissutigaa.
