Herstedvesterimi iluarsartuusinissaq piumasarineqarpoq
Kalaaleq Danmarkimi Herstedvesterimi inissiisarfimmiittussanngorlugu danskit eqqartuussiviannit pineqaatissinneqarsimasoq sapaatip akunneri marluk matuma siornagut imminorpoq.
Pineqaatissinneqarsimasoq imminortoq Herstedvesterip tarniluttunut immikkut inissiisarfianiittussanngortitaasimavoq.
Herstedvesterip tarniluttunut immikkoortortaani ukiup affaata ingerlanerani imminortut taamaalillutik pingasunngorput.
Taama alianartumik pisoqarmat inissiisarfimmik iluarsartuussinissap piaartumik aallartinneqarnissaa piumasarineqarpoq.
Folketingip ombudsmandiata inissiisarfimmik nakkutilliilluni misissuinini kingulleq tunngavigalugu naliliivoq inissiisarfimmi atukkat assut naammaginanngitsuusut.
Herstedvesterip pisortaa Lene Møller-Nielsen radioavisemut oqarpoq pinerluuteqarsimasunut isumaginninnermut pisortaqarfik tamanna pillugu aqagu ataatsimeeqatigineqassasoq ataatsimiinnermilu sutigut iluarsartuussisoqartariaqarnera eqqartorneqassasoq.
