Herstedvesteri pillugu nalunaarusiortoqarpoq
Kalaallinik Danmarkimi Herstedvesterimi piffissami aalajangigaanngitsumi inissinneqartussanngorlugit pineqaatissiisarneq ukiuni 50-inngulersuni atuutsinneqareeraluartoq, tamatuma suna nassatarisarneraa misissuiffigineqarnikuunngilaq.
Nalunaarusiarli ” Grønlandske Herstedvesterfanger”-imik taaguuteqartinneqartoq maanna saqqummerpoq, taannalu Ilaqutariinnermut Pisortaqarfimmi tallimanngorpat saqqummiunneqassaaq.
Norgemiu pinerluttorsiortoq, Dr. Jur. Evy Frantzsen nalunaarusiamik suliarinnittuuvoq, allagaatit misissuataarnerisigut makku apeqqutit akissutissarsiniarsimavai: Kalaallit qassit ukiut ingerlanerini Herstedvesterimiittussanngortinneqarsimappat, qanoq sivisutigisumik parnaarussivimmiittarsimappat, qassit Kalaallit Nunaannut utertariaqarsimappat, qassit nalinginnaasumik ullumikkut inuuneqarpat, aamma nalinginnaasumik inuunertik qanoq atorpaat?
Ilisimatusarnermut Inatsisinik atortitsinermut ministereqarfiup aningaasanik immikkoortitaanik tapiiffigineqarluni Evy Frantzsen nalunaarusiorpoq, misissuinerullu Kalaallit Nunaanni tamanut saqqummiunneqarnissaa taassuma kissaatigisimavaa.
