Hermann Berthelsen: Nunatsinnut pitsaaneq toqqarneqarpoq
Tamannalu soorunami Kommuneqarfik Sermersuup borgmesteriata, Asii Chemnitz Narup quarsaarnartuusoq oqaatigaa.
Qeqqata Kommuniani borgermesterip, Hermann Berthelsenip uppernarsarpaa, kommunit sinnerisa isumaqatigiinniarnermi naatsorsueriaaseq alla toqqarsimagaat, tassa Kommuneqarfik Sermersooq 117 millionit koruuninik akiliinerusussanngorlugu.
Naatsorsueriaaseq kingulleq akuerineqassagaluarpat, taava Qeqqata Kommunia 12 millioninik akiliinani 5 million koruuninik pisalissagaluarluni.
AAMMA ATUARUK IA avannaani: Kommuni alla atugarliortittariaqanngilarput
Hermann Berthelsen aperaarput, isumaqatigiinniarnerit siuliani Qeqqata Kommuniata akiliutigisartakkami qaavatigut, 12 miilion koruuninik akiliisarnissaralua, massakkut qanoq isikkoqarnersoq, Hermann Berthelsenilu ima akivoq:
- Aningaasartai pivallaarnagit eqqarsarnikuuvugut. Suut tunngavigalugit naatsorsueriaaseq ingelatissavarput?
- Innarluutillit, utoqqaat, meeqqat inuusuttullu, Namminersorlutik Oqartussat suliffeqarfiisa tamakkiisumik agguartarnissai. Tassa tamakku tunngavigalugit naatsorsuusiornissaq pingaartipparput, Hermann Berthelsen radioaviisimut oqarpoq.
Sermersooq isumaqatigaa, kisiannili…
Kommuneqarfik Sermersuumi borgermesterip, Asii Chemnitz Narupip siusinnerusukkut oqaatigaa, isumaqatiigiinniarnerni paasissutissat tunngaviusut amigartut. Hermann Berthelsenilu aperaarput massakkut paasissutissat naammattut pigineqalersimanersut.
- Asii Chemnitz Narupi ilumoorluinnarpoq. Ataatsimiinnerni tamani paasissutissat assigiinngitsut saqqummertarput, soorunami politikkikkut apeqqutigut aallaavigalugit.
- Massakkullu periusissat assiginngitsut 50-it missaaniipput. Neriuppunga Naalakkersuisoq (Vittus Qujaukitsoq, aaqqissuisoqarfimmit) aaliangiinissaminut tunngavissarsiorluassasoq, Hermann Berthelsen oqarpoq.
AAMMA ATUARUK Kommunalbestyrelsimi ilaasortat Jess Svane mamiasuutigaat
Hermann Berthelsenip, Kommuneqarfik Sermersuup borgemesteria isumaqatigigaluarlugu, Hermann Berthelsen isumaqarpoq, nalimmassaanermut periusissaq borgemesterinit pingasunit tikkuarneqarsimasoq Nunatsinnut pitsaanerpaasoq.
Hermann Berthelsenip naggasiutigalugu oqaatigaa, taamatut isumaqatigiinninniarnerni isumaqatigiinnissaq ajornakusoorsinnaasoq, taamaammallu politikkikkut aalajangiisoqarnissaa tapersersorlugu.
Qaasuitsup Kommuniani borgermesteri, Ole Dorph, oqaaseqartinniaraluaratsigut, suli nalimmassaanermut periusissamik aalajangertoqanngimmat taanna oqaaseqarumanngilaq.