Hermann Berthelsen: Naalakkersuisut tappinnerulertariaqarput

Kangerlussuarmi mittarfeqarfiup allineqartariaqarnera pillugu Inatsisartut oqallisiginninnerat Sisimiuni borgmesterip Hermann Berthelsenip eqqumiigaa.

Inatsisartut oqallinneranni oqaatigineqarpoq Kangerlussuaq aqqusaarlugu Nuummut ingerlaqqittartut timmisartunut ilaasut tamarmiusut 60 procenterigaat.

- Kisitsisimmi saqqummiunneqartut Air Greenlandip ilaasunik nalunaarsuinerinut naapertuutinngillat, Hermann Berthelsen oqarpoq.

Air Greenlandip ukioq 2005-imi nalunaarsugai naapertorlugit Københavnimit nunatsinnut Nuummullu ingerlaartut Air Greenlandip ilaasuisa 40 procenterisimavaat. Nuummukartartullu ikiliartortut nalunaarsuinerup aamma takutikkaa, Hermann Berthelsen allappoq.

Oqarpoq Københavnimit nunatsinnukartunit tamarmiusunit 9.000-t Kangerlussuarmut ingerlasuusimasut, Kangerlussuarmullu takornariat amerliartortut nalunaarsuinerup takutikkaa.

Air Greenlandip saniatigut timmisartuutileqatigiit allat atorlugit Kangerlussuarmut 2005-imi takornariarsimasut 2.000-iusimasut Hermann Berthelsen erseqqissaavoq.

Hermann Berthelsen allappoq, Nunatta takornarifiunerulersimaneranut Naalakkersuisut tappinnerulertariaqartut, Inatsisartunilu ilaasortat Kangerlussuarmi Sisimiunilu takornariarfissanut misileeqqullugit kajumissaarpai.