Hermann Berthelsen borgmesterinngoqqippoq

Nunatsinni illoqarfiit annersaata tulliani, tassalu Sisimiuni kommunalbestyrelsemut inissitsiternerit ualeq manna naammassipput, borgmesterinngorporlu ilimagineqareersutut Siumumeersoq 49-nik ukiulik Hermann Berthelsen. Siumut kommunalbestyrelsemi ilaasortaatitaqarnerpaammat kisimiilluni ingerlatsisinnaagaluarpoq, partiili Atassut qinerseqatigisarniarlugu isumaqatigiissuteqarfigisimallugu borgmesterinngortoq erseqqissaavoq.

- Suleqatigiinneq pituttugaanngilaq, taaseqatigiittassaagulli. Ajornartorsiutit annertuut aamma pineqassatillugit oqaloqatigiittassaavut. Aammali Siumumit nalilerparput, arfineq-marluinnaanata qulingiluaallutali pitsanngorsaataasinnaasunik ajornartorsiutinullu iluarsiissutaasinnaasunik suliniuteqartassagutta pitsaanerussasoq. Hermann Berthelsen oqarpoq.

Aamma oqarpoq, Atassut suleqataalernermigut ataatsimiititaliat tamaasa ilaasortaaffigilerpai, suleqataasimanngitsuuguni taamaaliorsinnaasimanngikkaluarluni.

Sisimiuni ukiuni tulliuttuni suliniutissat pingaarnerit ilagaat, Kangerlussuarmut aqquserngup piviusunngortinniarnissaa, kulturikkut illorsuartaarnissap aalajangiiffiginissaa inuutissarsiutigullu siarsaanissat assigiinngitsut. Kommunalbestyrelsemut qinersinissaq sioqqullugu partiit allat Siumumut illua´tungiliuttumik inissittarsimapput, Atassummik maanna suleqateqalerneq qanoq nalilerpiuk ?

- Uagutsinnut soorunami nuannersorujussuuvoq, suli amerlanerulluta suleqatigiilernerput. Aamma qineqqusaarnerni oqaaserpassuit aninneqartarput, maannali qinersineq naammassereerpoq annertunerpaamillu tunuliaqutaqarluni ingerlatsinissaq pingaarneruvoq. Borgmesteri erseqqissaavoq.

Hermann Berthelsen aamma oqarpoq, kommunit kattussuunnissaannut atatillugu iusinnerusukkulli oqaluuserineqarsimasoq, Maniitsoq siulliullugu oqaloqatigineqassasoq kingornagullu aamma Kangaatsiaq oqaloqatigineqarsinnaassasoq.

Sisimiuni Demokraatit aamma Inuit Ataqatigiit kommunalbestyrelsemi ilaasortaatitaat katillugit sisamaasut IA-meersoq Agathe Fontain borgmesterissatut ataatsimoorlutik inassutigisimagaluarpaat, Siumukkulli Atassutikkullu qulingiluaallutik amerlanerussuteqarnertik atorlugu Hermann Berthelsen borgmesterinngortippaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat