Hermann B.: Sisimiut Kangerlussuarlu periarfissaapput
Kuupik Kleist aamma Gitte Lillelund Bech Hermann Berthelsenip kaammattorpai Issittumi Sakkutooqarfiup Sisimiuni Kangerlussuarmilu inissinneqarnissaanut periarfissat misissoqqullugit.
Hermann Berthelsenip oqaatigaa nunap suugaluartulluunniit pitsaasumik illersorneqarnissani anguniarlugu sakkutuut timmisartortartut, imarsiortut sakkutuullu ataqatigiissumik suleqatigiinnissaata pingaassusianik. Tamannalu Sisimiuni Kangerlussuarmilu anguneqarsinnaasoq oqarluni.
Kangerlussuarmi silarluppiartanngitsumi sakkutuut timmisartui inissisimalluarsinnaapput.
Sisimiuni Kangerlussuarmilu sakkutuut pitsaanerusumik inissinneqarsinnaanngillat, aammami Siriusinut ukioq kaajallallugu Kangerlussuarmiit Sermersuaq tikinneqarsinnaavoq.
Sakkutuunut imarsiortunut Sisimiuni ukioq kaajallallugu ammasumik umiarsualiveqartoqarnissaq pitsaalluinnarpoq. Taanna sikuneq ajortumi avannarpasinnersaavoq, Sullualummut qaninnerpaajulluni, Qeqertarsuup eqqaani uuliaqarfimmut aamma Ilulissanut umiarsuit takornariartaatit tikinnerpaasarfiannut qaninnerpaajulluni.
Sisimiut Kangerlussuullu akornanni nunarujussuarmi kalaallit amerlanerusut sakkutuunngorniartinneqarsinnaapput, nunatsinni sakkutooqarnikkut akuunerulernissarput anguniassallugu pissusissamisuuginnarmat.
Sisimiut Kangerlussuarlu ataatsimut isigalugu inissiffigissallugit pissusissamisoornerpaavoq, Naalagaaffeqatigiinnerup Sakkutooqarfiata sumi inissisimanissaa siunissami qanittumi aalajangerneqalerpat, Hermann Berthelsen naggasiivoq.
