Hepatitis B-mut akiuussutissamik kapoorisoqartariaqarpoq
Nakorsaq PhD-millu ilinniartoq Malene Børresen Kalaallit Nunaanni tingulluummut hepatitis B-mut akiuussutissiisoqartarnissaa pillugu taama oqarpoq. Taassuma misissuinermini paasisimavaa Kalaallit Nunaanni meeqqat pisariaqartitaminnik naammattunik akiuussutissanik kapitinneq ajortut, naak inunngormata anaanaat tunillatsissimagaluartut.
Alaskami Canadamilu ukiorpassuarni akiuussutissanik kapuuisarnerminni tingulluummut akiuussutissaq ilaatissimavaat, tamaanilu meeqqanik tunillatsittartunik nutaanik soqarpianngingajavittoq Malene Børresenip oqaatigaa. Taassuma issittumi peqqinneq pillugu misissuinini Yellowknifemi isumasioqatigiinnermi oqaluttuaraa.
Tingulluut tuniluuttoq hepatitis B Kalaallit Nunaanni atugaasorujussuuvoq, innuttaasut 8 procentiisa ataavartumik atugaralugu taamalu aammikkut anisuumikkullu tunillaasinnaallutik. Amerlasoorpassuit tunillatsissimallutik nalusarpaat ukiulli amerlasuut qaangiukkaangata tingui millisinnaasarlutik tingummikkulluunniit kræfteqalersinnaasarlutik.
Anaanaasoq tunillatsissimappat meeraq inunngornermini akiuussutissinneqassaaq ukioqalinnginneranilu aamma pingasoriarluni akiuussutissinneqassalluni. Meeqqat tallimararterutaat akiuussutissamik ataasinnguamilluunniit kapitinneq ajortut meeqqallu pingasorarterutaannaat akiuussutissat sisamat tamaasa pisarsimagaat Malene Børresenip misissuinerisa takutippaat.
- Kalaallit Nunaanni meeqqat tamaasa hepatitis-B-mut akiuussutissaannik kapisartuugutsigit meeqqat tingulluummik tunillatsittartut takussaassagaluarpavut. Taamaaliornikkuttaaq nappaat isiginiarneqarnerulissagaluarpoq taamatullu meeqqat tunillatsissimasunik anaanallit eqqumaffigineqarnerulerlutik, Malene Børresen oqarpoq.
Issittumi peqqinneq pillugu Yellowknifemi Canadamiittumi isumasioqatigiinnersuarmi nunatsinniit Danmarkimiillu katillutik 25-t peqataapput.