Hepatitis B-mut akiuussusiisaleqqusipput

Tingulluummut hepatitis-imut akiuussutissaliisarnerup eqqunneqarnissaa ilisimatuut tapersersorpaat.

Tingulluummut hepatitis B-mut akiuussutissalersuinerup meeqqat akiuussutissalerneqartarnissaannut pilersaarummi ilanngunneqarnera Danmarkimi Statens Seruminstitutimi ilisimatuunit nuannaarutineqarpoq.

Hepatitis B aakkut, anisuukkut, anaanaasumiit meeqqamut, qaqutigoornerusumillu meeqqamiit meeqqamut qisikkut, kilernertigut, kimillatsiternikkulluunniit tunillaattarpoq.

Siornatigut misissuisarsimanerit takutippaat inuiaqatigiit 5-10 procentii hepatitis B-mik attatariualikkaminnik tunillanneqarsimasut. Itillimi innuttaasunik ukiumoortumik aaviisarluni misissuinerup Statens Seruminstitutip 2004-mili ingerlassimasaata takutippaa nunaqarfimmi innutaasunit 130-usunit 83-it inuunermik ilaani hepatitis B-mik tunillatsissimasut, 27 procentillu attatariualikkaminnik tunillatsissimallutik. Tamanna Kalaallit Nunaanni allani takusartakkaninngarnit annertunerunera assut malunnarpoq. Siornatigut misissuisarsimanerit aammattaaq ersersippaat Kalaallit Nunaanni tunillaassuunneq pingaartumik inuusuttunngornermi inersimasunngornermilu atoqatigiinnikkut pisartoq.

Itillimi attatariualikkaminnik tunillatsissimasut affaat 20-t inorlugit ukioqarput ilisimatuullu qularnaarlugu paasivaat nunaqarfimmi tunillaassuunneq pingaartumik meeqqamiit meeqqamut pisartoq, imaanngitsoq inersimasumiit meeqqamut.

- Misissuinerup ersersippaa Kalaallit Nunaanni hepatitis B-p virusianik tunillatsinnissaq siornatigut ilimagineqartuminngarnit ulorianaateqarnerusoq. Taamaattumik meeqqat akiuussutissalerneqartarnissaannut pilersaarummi hepatitits B-mut akiuussutissaliisarnerup ilanngunneqarnissaa inassutigaarput, Statens Seruminstitutimi nappaatinut tunillaassuuttunut ilisimatusarfimmi immikkoortortaqarfiup immikkoortortaaneersoq Malene Børresen oqarpoq.

Naalakkersuisunit meeqqat tamarmik hepatitis B-mut akiuussutissalersorneqarnissaannut aallarniutitut aningaasanik immikkoortitsisoqarpoq. Maannakkorpiaq akiuussutissap pisiarinissaanut isumaqatigiinniartoqarpoq tamatumalu kingorna akiuussutissalersuinerit aallartinneqassasut, Peqqinnissakkut Naalakkersuisoqarfimmit nalunnaarutigineqarpoq.

HBV tassaavoq attatariuakkamik tingukkut aseruuttoorneq aammalu tamanna tingummik eqittoornermut tingukkullu kræfteqalernermut pissutaasarluni, pingaartumik nunani siuarsarniakkani.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat