Henriette Kjær politikeritut tunuarpoq
Taakkualu saniatigut nalunaarluni politikkimik suliaqarunnaarniarluni, taamaammat tullianik Folketingimut qinersisoqalerpat qinigassanngortinniarani.
Henriette Kjær ilaqutariittut aningaasaqarniarnertik pillugu sapaatip akunnerini kingullerni marlunni tatisimaneqarsimavoq. Sanasunut akiligassat akilinngitsoortarsimavai aningaasaateqarfimmillu atukkamik naafferarlugit akilersorneri unitsittarsimavai, ilaatigullu eqqartuussisutigut akileeqquneqartarluni - aamma aappanilu Erik Skov Petersen illuat arlaleriarluni pinngitsaaliissummik tunineqangajattarpoq.
Naalakkersuisut ippassaq Danmarkimi sulisinnaajunnaarnersiutit atorunnaarnissaannut pilersaarutit saqqummiuppaat, qulequtserlugit; "Atugarissaarnerput atorniaqattaarluta aningaasalersorsinnaanngilarput", kisianni aamma tassani Henriette Kjærip inuttut ajornartorsiutai sammineqarniaannarmata naalakkersuisut ullumi qatsussipput. Henriette Kjærip inuttut aningaasat tungaatigut ajornartorsiuteqarnini pillugu siornatigut ministeriulluni tunuartariaqarnikuuvoq, maannakkulli tassa politikki tununniarlugu aalajangerpoq.
- Kikkulluunniit inuttut inuunertik nittarsaanneqartinnagu inuusinnaasariaqarput, piffissamilu kingullermi eqqarsaatigisalersimavara uanga aamma taamatut pisinnaatitaaffeqarsinnaanngikkuma politikkikkut suliunnaartariaqarlunga.
Konservativet siulittaasortaavat Lars Barfod oqarpoq Henriette Kjærip tunuarnera ajuusaarutigigaluarlugu eqqissiimerusunnera paasisinnaalluarlugu.
Konservativet Folketingimi ilaasortaatitaasa ullumi Tom Behnke siulittaasumittut toqqarpaat, kulturministeriusimasorlu Carina Christensen politikkikkut oqaaseqartartutut toqqarlugu, DR-imiit Klaus K. Nielsen ilanngutassiorpoq.
