Hellep Villy Kuupillu unitsissimavai
Aviisip Berlingskep paasisai naapertorlugit Søvndal ministeriuneqarfimmit ataatsimiinnermut peqataaqqunagu qinnuigineqarsimavoq.
Suliffeqarfimmi sanaartugassanik suliassinneqartartumi MT Højgaardimi aamma ingeniørit siunnersuisartut suliffeqarfianni Orbiconimi siuttut, Danmarkimi nunanut allanut tunngasunut ministerimik aamma Naalakkersuisut siulittaasuannik Kuupik V. Kleistimik ataatsimiigiaqqusisimapput, matumani Nunatsinni aatsitassanik ujaasinermi Danmarkimi soraarnerussutisianut aningaasaateqarfiit nunani tamalaani suliffeqarfinnik Nunatsinni aatsitassarsiornermut tunngatillugu suliaqartunik aningaasaliisinnaanerat pillugu suleqatigiissinnaaneq oqaluuseritinniarneqarluni.
Ministeriunerup ataatsimiinnissamut akuliunnerata kinguneranik, ataatsimiinnissaq MT Højgaardimit aamma Orbiconimit taamaatiinnarneqarpoq.
Nunanut allanut tunngasunut ministerip aviisimi Berlingskemi apersorneqarnera tunngavigalugu, suliffeqarfiit taakku marluk, nunani allamiut suliffeqarfiutaannik annerusunik siunnersuisutut akuutinneqartareersut ataatsimeeqarusussimagaluarput.
Kalaallit Nunaanni aatsitassarsiornissamut qallunaanut aningaasaliiniartunut siuttuunissani Søvndalip aviisimi Berlingskemi oqaatigaa.
Danmarkimi suliffeqarfiit angisuut aamma soraarnerussutisianut aningaasaateqarfiit angisuut ataatsimoorlutik nunani allamiut suliffeqarfiinik misissueqqissaarnermik aatsitassarsiornermillu ingerlataqartunik Danmark Nunatsinni tamakkuninnga suliniuteqartuni Kiinamiutulli suleqataalersinnaagaluarpoq.
Qallunaat aningaasaliisartut aamma nunani allamiut aatsitassarsiortitseqatigiiffiisa suleqatigiissinnaanissaannut periarfissaq maanna kingulliusoq, MT Højgaardimi Orbiconimilu isumaqarput.
Berlingske Tidendemi allaaserisaq naapertorlugu ministeriuneqarfik ullumi oqaaseqarusunngilaq. Aqaguli imaluunniit aqaguagu Danmarkimi naalakkersuisut siuttui, tassaasut ministeriuneq Helle Thorning-Schmidt aamma aningaasaqarnermut ministeri Bjarne Corydon, aningaasarsiornermut ministeri Margrethe Vestager kiisalu inuussutissarsiornermut ineriartortitsinermullu ministeri Annette Vilhelmsen naalakkersuisut ataqatigiissaarinermut ataatsimiititaliaani, ilaatigut Nunarput oqaluuserineqassaaq.
