Helle Thorning, Villy Søvndal Morten Bødskovilu Nunarput pillugu isumasiorneqalersut
Kalaallit Nunaannut tunngatillugu nunanut allanut sillimaniarnikkullu tunngasunut politikki tunngavigalugu aggersaasoqarpoq, kisianni soorlu aamma suliniutit angisuut pillugit inatsit uranimillu piiaaneq pillugu apeqquteqartoqarumaartoq?
- Kalaallit Nunaat maannakkorpiaq annertuunik pisoqarfiuvoq. Naalagaaffeqatigiit avannarlersaata pisoqarfiunera nuannaarutissaavoq, ilusinippallaannginnerinili piumasarineqartutigut isumagisassat isumagisariaqarpagut. Kinamiorpassuit nunamut isaanissaat oqallisaasupilussuaq paasisaqarfigerusupparput, aammattaaq SAR-imik upalungaarsimaniarnerup nunamillu piginnittuunerup ataqqineqarnissaanik atuutsitsinerup nakkutilliinerullu siunissami inissisimanissaat pillugit ministerinit paasisaqarusuppugut, Troels Lund Poulsen knr.gl-imut oqarpoq.
Ministeriuneq isumasiorniarlugu aggersaasoqarnera namminersorneq pillugu inatsisip pitsaassusaa pillugu oqallinnermik aallartitsiniarnermik aallaaveqannginnera sakkortuumik naqissuserpaa. Assigiinngitsut nassuiartariaqartut paasisaqarfiginissaannik siunertaqarpoq, avatangiisinullu, ilinniarnertitaanermut akileraartarnermullu ministeriusimasup ministeriunerup tamakkununnga marlunngormat isumasiuinermi akissutissaqarnissaa naatsorsuutigaa.
-Kalaallit Nunaanni ukiut amerlanngitsut qaangiuppata aatsitassanik qaqutigoortunik piiasoqassappat, sillimaniarnerup uranimullu tunngatillugu akisussaaffinnik agguataarinerup qulakkeereersimanissaat pisariaqarpoq, aammattaaq sulisartut nunanit allaneersut, suliniutini angisuuni pisariaqartinneqartussat pillugit apeqqutissaqarpugut. Kalaallit Nunaata pinngortitap pisuussutaanik tamakkiisumik atorluaarusunnera paasilluarsinnaavarput, tamannali pitinnagu piumasarineqartutigut isumagisassat isumageqquinnarpagut, Troels Lund Poulsen oqarpoq.
