Helle Thorning-Schmidt nunatsinnit isumalluarfigineqarpoq

Danmarkimi Socialdemokratit siulittaasortaavat Helle Thorning-Schmidt ippassaq ivertinneqartoq nunatta Folketingimi ilaasortaatitaasa marluk isumalluarfigaat.

- Socialdemokratinik ukiorpassuarni suleqateqartarsimagatta kina siulittaasunngussanersoq pissanngatigisimavarput. Siumumeersoq Lars-Emil Johansen oqarpoq.

Taamaattorli Socialdemokratit siulittaasoqarnerup tungaatigut assortuussuteqartarsimanerat suleqatigiinniarnermut sunniuteqartarsimasoq miserratiginngilaa.

- Socialdemokratit taasinermikkut siulittaasussarsiornerat assut torrallataavoq, neriuppungalu nunatsinni aamma taamatut sapiissuseqarsinnaalerumaartugut, Lars-Emil Johansen erseqqissaavoq.

Folketingimi ilaasortaaqataata Inuit Ataqatigiinneersup Kuupik Kleistip Socialdemokratit qanoq ingerlariaqqikkumaarnerat pissanngatigaa.

- Siulittaasumik qinersiniarnerat imaannaasimanngeqaaq aamma Helle Thorning-Schmidtip Danmarkimi politikkimi akulerusimasimanera annikimmat qanoq pissuseqarumaarnersoq eqqoriaruminaappoq. Kuupik Kleist naliliivoq.

Taamaattorli naalagaaffeqatigiinnermut tunngasuni isummanik eqaannerusunik saqqummiinissaa neriuutiginerarpaa, ullunilu tulliuttuni oqaloqatiginissaa pilersaarutaasoq erseqqissaatigalugu.