Helle Thorning-Schmidt Danmarkimi politikkimit tunuarpoq

Helle Thorning-Schmidtip ministeriunertut kingoraartaata Lars Løkke Rasmussenip, Socialdemokratillu siulittaasortaavata Mette frederiksenip, Thorning-Schmidtip atorfittaarnerani pilluaqquaat.

- Pilluarit Helle! Atorfimmut taama nuimatigisumik atorfittaarnerit ilinnut tulluuppoq. Danmark pillugu sulisimaninnut unammillertitullu qutsavigaakkit. Meeqqat paarilluakkit, ministeriuneq Lars Løkke Rasmussen, internetikkut attaveqaqatigiittarfikkut Twitterikkut ilaatigut taama allappoq.

Mette Frederiksenittaaq Helle Thorning-Schmidt qutsavigaa:

- Helle piumassuseqartuuvoq, nunanilu tamalaani meeqqat pillugit malunnaatilimmik sullissiumaarluni. Pilluarit, Danmarkilu socialdemokratillu pillugit sulisimaninnut qujanaq, Mette Frederiksen oqarpoq.

Siornatigut ministeriunerusimasoq Save the Children Internationalimi pisortaanertut apriilimi sulilissaaq, Londonimilu najugaqalissalluni. Uia Stephen Kinnock tamaani najugaqartuuvoq, Tuluit inatsisartuini ilaasortaanermigut Londonimi najugaqartuulluni.

Meeqqat pillugit suliniaqatigiiffik 25.000-it missaannik sulisoqarpoq, ukiullu ataatsip ingerlanerani 2 milliardit dollarinik, tassa 13,8 milliardit koruunit missaannik kaaviiaartitaqarluni.