Helle Thorning: Isumaqatigiissut isumaqatigiissutaavoq
- Namminersorneq pillugu isumaqatigiissut sukumiisumik suliaavoq ataatsimiitaliarsuup suliaa tunngavigalugu ilusilersugaangami taannalu Folketingimi amerlanerussuteqarluartunit tapersersorneqarpoq. Tamanna nalornissutissaanngilaq. Oqartussaaffimmik Kalaallit Nunaannut nuussisoqaraangat taava kalaallit oqartussaafigilertarpaat aamma taamaappoq isertitat eqqarsaatigalugit. Tamanna nalornissutaasariaqanngikkaluarporluunniit statsminister KNR-mit immikkut apersorneqarluni oqarpoq.
Berlingske Tidendemi ullumi saqqummersumi Folketingimi nunarput pillugu oqaaseqartartut arlallit oqariartuutigigaluarpaat aatsitassat pillugit isertitat avitseqatigiissutiginissaat nalilersoqqittariaqartoq. Tamanna pivoq Isukasiani aatsitassarsiorfissami isertitat 32 milliardit missaanniinnissaat ilimagineqalermat. Isumaqatigiissulli allanngortittariaqanngitsoq statsministeri isumaqarpoq.
- Uanga nammineq isumaqarpunga isumaqatigiissut naapertuilluartuusoq. Namminersorneq pillugu isumaqatigiissusiorsimavugut isumaqatigiissullu taanna malittariaqarparput. Isumaqarpunga pitsaasuusoq piareersimasutut misigilerfimmi oqartussaaffiit kalaallit namminneq tigusinnaammatigit. Aammali eqqaamasariaqarparput oqartussaaffiit tiguneqaraangata, soorlu aatsitassanut tunngasut, aqunneqarnerat isertitallu kalaallit isumagisussaammatigit, Helle Thorning Schmidt oqarpoq.
Taamaammat Kuupik V. Kleist naalagaaffeqatigiit siuttuisa Helle Thorning Schmidtip, Savalimmiuni Naalakkersuisut siulittaasuata Kaj Leo Johannesenip Igalikumi ataatsimeeqatiginissaani ernummatissaaruppasippoq. Ataatsimiinnissarlu taanna statsministerip qilanaarinerarpaa.
- Periarfissami matumani suleqatigiittut naapittussaavugut assullu qilanaarpunga Kalaallit Nunaannut tikeraarnissannut suleqatillu naapinissaannut, Helle Thorning Schmidt oqarpoq.
Namminersorneq pillugu isumaqatigiissummi aatsitassanit isertitat agguaannissaat pillugu isumaqatigiissummi allaqqavoq 75 millioner koruunit siulliit Kalaallit Nunaata kisimi pissagai, taakku sinnerpatigit qeqqatigut Danmarkilu avitseqatigiittoqassasoq, aammalu taama pisoqarnerani Naalagaaffiup ataatsimoortumik tapiissutai ilanngarneqartassasut. Isertitat ataatsimoortumik tapiissutinit amerlaninngorpata agguataarnissaat nutaamik isumaqatigiinniutigineqartussaavoq.
Naalagaaffeqatigiinnermi ataatsimiinneq aggustip 30-at Igalikumi pissaaaq. Statstministeri siullerpaamik Igalikumiissaaq tassanilu tikeraarnermini uini Stephen Kinnock ilagissamaarpaa.
