Helle Siegstad: Pinngortitaleriffik siunnersuisuusussaavoq
Inatsisartuni illuatungeriit raajarniarnermik nalunaarusiassaq p illugu sakkortuumik oqallinnermini Pinngortitaleriffik eqqaallattaartuartarpaat.
Pinngortitaleriffimmiulli politikkikkut aaqqiagiinnginnermi arlaannaanulluunniit ilanngukkusunngillat. Helle Siegstad, Pinngortitaleriffiup aalisakkanut raajanullu immikkoortortaqarfiani ningiuusoq, taama oqarpoq, nangillunilu:
Pinngortitaleriffiup siunnersuinissaq suliassaraa, pitsaanerpaamillu aatsaat siunnersuisinnaavugut paasissutissat sukumiinerpaat pissarsiarisimangaangatsigit.
Pinngortitaleriffiup raajarniarneq pillugu nalunaarusiaq massakkut atuuttoq innersuussutiginikuuaa, nalunaarusiammi imarivaa umiarsuup allattuivianut – tassa logbogi-mut - pisat tamarluinnarmik, raajat aseqqukut ilanngullugit pinngitsoornani allattorsimasarnissaanik raajarniat pisussaatitaaffeqarlutik. Tupinnarpallaassanngilarlu nalunaarusiap atuuttup atuutsiinnarneqarnissaa inatsisartuni amerlanerussuteqartunit akuerineqassappat.
- Raajarpassuaqarpoq, piffissarlu qaninneq isigissagaanni allannguuteqartoqarnissaa ilimaginngilarput. Soorunami raajanik eqqoqqissaartumik nalilersuisinnaanngilagut, imaaniilli sorpiaat qaqinneqartarnersut sukumiisumik paasisaqarfigisimanngikkutsigik siunissami naliliisarnivut uniornerulersinnaapput, Helle Siegstad naggasiivoq.
