Assi: Simon Uldum/KNR

Heliportinngortitsiniarneq Partii Naleqqap Demokraatillu isummerfigerusunngikkaat

Mittarfiliortiternikkut pissarsiaqarnerpaajumalluni Kangerlussuarmi Narsarsuarmilu mittarfiit qulimiguulinnut mittarfinngussanersut Partii Naleqqap Demokraatillu isummerfigerusunngilaat:

Nuummi Ilulissanilu mittarfissuaqalerpat taamatuttaaq Qaqortumi mittarfittaartoqarpat nunatta ukiut 25-t ingerlanerini 1,3 milliardit koruunit sipaarutigissagai, misissueqqissaarnerup Naalakkersuisut sanatissimasaanni atuarneqarsinnaavoq.

Mittarfissuilli sananeqarnerisigut sipaarutiginiarneqartut anguneqassappata Kangerlussuarmi Narsarsuarmilu mittarfiit qulimiguulinnut mittarfinngortinneqartariaqassapput.

Per Rosing-Petersenili, Partii Naleqqameersup, nalunaarusiami naatsorsuinerit isummerfigerusunngilai. Mittarfiliortoqarnissaa pillugu aalajangiisoqassappat misissueqqissaarnerit pisariaqartut, Per Rosing-Petersenip oqaatigaa:

- Nalunaarutit tunngavigalugit nalilersortariaqarparput. Taama assigiinngitsigisumik oqaqattaartut. Naamiinngilagut, anginngilagut, misissuineq aallaaviusariaqarpoq. Taamaattumik partiit suleqatigalugit taakku aallartisartariaqarpavut. Qinersereernerup kingorna aamma, Per Rosing-Petersen, Partii Naleraq sinnerlugu qinigassanngortittoq taama oqarpoq.

AAMMA ATUARUK Kim Kielsenip Kangerlussuaq heliportinngortikkusunngikkaa

Kisitsisit nalunaarusiami saqqummiunneqartut Demokraatit siulittaasuannit Randi Vestergaard Evaldsenimit iluarineqarput. Demokraatit Nuummi, Ilulissani Qaqortumilu mittarfiliortoqarnissaanut piareersimapput.

Randi Vestergaard Evaldsenili KNR-imut mailikkut ima ilaatigut allaaserisaqarpoq:

- Kangerlussuarmut Narsarsuarmullu atatillugu taakkunani pisortat ineriartortitsinissamut periarfissanullu akuliutissanngillat. Tamaani innuttaasut namminersortullu tamanna namminneq isumagissavaat.

Pisortat uagullu qinikkat innuttaasut sumi najugaqassanersut akuliuffigissanngilarput, innuttaasut namminneq tamanna aalajangissavaat, Randi Vestergaard Evaldsen KNR-imut mailikkut taama allaaserisaqarpoq.

Partiit taakku marluk mittarfiit nutaat oqaluuserineqarnerannut atatillugu Kangerlussuup siunissaanut toqqaannartumik taamaasillutik isumminngillat.

Mittarfiit nutaat pilersinneqarpata Kangerlussuup siunissaanut Inuit Ataqatigiit siulittaasuata Sara Olsvigip aamma isummerfiginngilaa. Paasissutissat sukumiinerusut taassuma ujartorpai, soorlu aamma Partii Naleraq taama oqartoq.

Mittarfiit nutaat pilersinneqarpata Kangerlussuup siunissaa pillugu IA-mit isummerfigineqanngilaq.

Kangerlussuarmi mittarfik 1.500 meterinngorlugu nunatta iluani angalasunut mittarfinngussappat milliardip affaanik akeqassasoq,
Siumup siulittaasuata Kim Kielsenip oqaatigaa, taamaalippallu mittarfiliornikkut inuiaqatigiinnut sipaarutissat tamakkiisut ikinnerussapput.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat