Heli Greenland-ip upalungaarsimanermut suliassat isumagiumagaat
- Nunatsinni qulannaatsumik upalungaarsimanissaannut periusissaq aajuna. Tamanna uannut pingaarnerpaajuvoq. Heli Greenland-imi atorfeqarninnik suliarigakku naalaatsornerinnaavoq, suliarli taanngassimaarutigaara, Heli Greenlandimi sulisup aappa, allaffissornikkut pisortaq Peter Frederiksen oqarpoq.
Tassami Heli Greenland Kalaallit Nunaanni upalungaarsimanissamut periusissatut siunnersuummik ukiut kingulliit marluk suliaqarsimavoq. Siunnersuullu suliassanik tamanik isumaginninnissamik imaqartoq, ilaatigut suliffeqarfik ISlandimiittoq NAMA suleqatigalugu suliarineqarpoq.
-Siunnersuutit Illersornissamut aamma inatsisinik atortitsinermut ministereqarfinnut nassiunneqassapput. Angummik, kinaaneranik oqaluttuarisassaarinngisannik, tamatuminnga Danmark-imi suliarinnittoqarpoq. Angut taanna ataatsimiititaliami upalungaarsimaneq SAR pillugu suliaqartumi siulittaasuuvoq. Aamma aqningaasat qanoq amerlatigisut atorniarneqarnersut nalunngilara, taakkuali qanoq amerlatiginersut oqaluttuarisinnaanngilara, Peter Frederiksen oqaluttuarpoq .
Timmisartuutileqatigiiffimmilu Heli Greenland-imi isumalluartorujussuupput.
unammillerneqartutut misiginnginnamik, suliassarlu piareersarluarsimagamikku.
- Timmisartunik inissiifiusartussamik nutaarluinnarmik 840 kvadratmeterisut angitigisumik, qulimiguulinnnut upalungaarsinermut atorneqarsinnaasunut marlunnut inissaqartumik sanasoqassaaq. Upalungaarsimanermi atortut Sisimiuniitinnisasanni tamanna pisariaqarsimavoq.
Kitaani imaatigut annaassiniartarneq politiit angallataat atorlugit suli ingerlanneqartassaaq.
Aamma kalerriigasuartarfik MRCC - centeri, suli Nuummiissaaq, qullersaqarfiussalluni.
Tunumi upalungaarsimaneq Island-imi sinerissami nakkutiilliisut, helikopter-inik angisuunik marlunnik upalungaarsimanermut atorneqartartunik umiarsuarnillu arlaqartunik peqartoq, suleqatigineqassaaq, taamaalilluni nunarput tamakkerluni, avanaannit kujataa tikillugu upalungaarsimanermik isumagineqassalluni, Peter Frederiksen oqarpoq.
Qulimiguullit qanoq ittorpiaat upalungaarsimanermut atorniarneqarnersut, Peter Frederiksen-ip oqaluttuariumanngilai.
Heli Greenland 2010-imi Tove Sivertsen-imit aallartinneqarpoq, kingorna Peter Frederiksen suleqataalerpoq. Suliffeqarfiup taassuma tuluit nunaanni tv-ikkut aallakaatitsisarfissuaq BBC, aamma amerikamiut avataarsuanik sullissivissua NASA aatsitassarsiorfiillu assigiinngitsut sullinnikuuaat.
Heli Greenland aallartikkami, qulimiguunik attartukkanik marlunik atorluni timmisartuussivoq, maannakkut Heli Greenland sisamanik helikopterinik peqarpoq.
