Helge Sander: Sila pillugu ilisimatusarfissaq isumalluarnarpoq

Allattoq Mads Lynge
aggustip 21-at 2007 06:34

Ilisimatusarnermut ministerip Helge Sanderip oqarnera naapertorlugu, sila pillugu Danmarkip naalagaaffiata Kalaallit Nunaanni ilisimatusarfiliornissamik kiisami pilersaaruteqalernerat tusarlugu isumalluarnarpoq.

- Ilulissat kommuneat sinnerlugu atorfilittat aammalumi politikerit nunarsuarmi politikikkut pisortat aammalu ilisimatusartut arlalippassuit ilassisarlugillu oqaloqatigisarpavut. Assersuutit ilagisinnaavaat USA-mi Repræsentanternes Husimi siulittaasoq, Nancy Pelosi, USA-p CO2-mik aniatitsinerminik apparsaanissaminik pilersaaruteqarnersoq aperineqarami aniguiniarsarisoq, Helge Sander oqarpoq, silallu allanngoriartornera pillugu Danmarkip ilisimatusarfiliornera pissusissamisoorsoralugu aamma oqaatigalugu.

Piffik eqqortoq tassaasinnaavoq Ilulissat, nunarsuarmioqatigiit eriagisassaattut kangerlulik UNESCO aqqutigalugu, Ilulissat kangerluat, Kangia, taamatullu silap allanngorneranik aalisarnermilu inuussutissarsiornermi annertuumik eqqorneqartumik ersarissunik avatangiisilik.

Ilulissat kommuneata ukiuni kingullerni pilersaarusiorlugulu aningaasaliisussarsiorpaa Ilulissat kangerlua pillugu ilisimasanik katersuiffissaq, isikkivilik kangerluup Kangiata paavanut iluliarsuarnullu, pilersaarullu tamanna Ilisimatusarnermut ministerip Helge Sanderip silap allanngoriartornera pillugu ilisimatusarfiliornissamut pilersaarutaanut taputartuunneqarsinnaalluarpoq.

Ilulissat kommuneat Ilisimatusarnermut ministerip pilersaarutaanut periarfissarsiueqataassalluni piareersimavoq, ministerilu, taamatullu Kalaallit Nunaanni susassaqarfimmi pineqartumi Naalakkersuisoq, ersarinnerusumik tamatumunnga atatillugu isumasioqatigissallugu soqutiginnilluni.