Helge Sander Polarbiblioteki pillugu nassuiaateqassaaq
Issittuni pissutsinik ilisimatusarfik Dansk Polarcenteri matoreersoq, Danmarkimi katersugaasivissuup nunarput pillugu ilisimatusarnermut qitiusumik aqutsisoqarfia, kingullertullu Polarbiblioteki matuneqareersullu danskit, kalaallit nunanilu tamalaani ilisimatusartut 100-t sinneqartut issittoq pillugu katersaatit qaqugukkulluunniit atorneqarsinnaanngorlugit piaartumik ataatsimoortillugit inissiffissarsiuunnissaat allakkatigut kaammattuutigaat. Ataatsimiititaliallu tamanna iliuuseqarfigileraa, Inuit Ataqatigiit sinnerlugit folketingimi ilaasortaq Juliane Henningsen oqarpoq.
- Ataatsimiititamiit pingaartipparput ilisimatusarnermut ministeri Helge Sander uani apeqquteqaateqarfigissallugu, qanoq pisumut oqaasissaqarnersoq. Kisianni aamma isumasioqatiginissaanut aggersassallugu pilersaaruteqarpugut, Juliane Henningsen aallartippoq.
Ataatsimiititaliap qulakkeersusuppaa katersat atorneqarsinnaanerisa iluaqutaasinnaanerisalu millisinnginnissaat, katersammi nunatsinneersut issittumeersullu amerlaqaat.
- Katersat sumut tamaanga siammakalaartinneqarnermikkut atortuarneqarsinnaanerannut periarfissat killeqalernissaat ernumassutigaarput, nangippoq.
Ilisimatusarnermut ministeri Helge Sander saaffigisaraluarlugu iliuuseqanngimmat Folketingip Kalaallit Nunaannut tunngasuni ataatsimiititaliaa akuliuttariaqarsoraaq. Katersaatit piuginnarnissaat atorneqarsinnaanerallu qulakkeertariaqarsoraat.
Polarbliotekimimi katersat nunarsuarmi issittoq pillugu katersukkat ataatsimoortut amerlanersaasa ilagaat, Juliane Henningsen oqarpoq.
- Illutaa taakkuinnarnut atussallugu angivallaalersimavoq. Attartortussarsioraluarnermi iluatsitsinnginnamik katersat siammakalaarnissaat siunniuppaat. Uggornarpoq. Paasinarnerussagaluarpoq inissaaleqineq pissutaasimagaluarpat, ksianni uani killormuanik ajornartorsiortoqarpoq, nassuiaavoq.
- Danmarki imminut aaginnassaaq, pingaartumik eqqarsaatigalugu issittumi ilisimatusarnerup ukiuni makkunani atsaat taama pingaaruteqartigilernera eqqarsaatigalugu, nangippoq.
- Maani ataatsimiititaliaminngaannit apeqqutit nassiuteriarlugit, taava ullormik Helge Sanderimik isumasioqatigiiffissamik nassaartussaavugut. Alloriarnerit tulliit taakkuussapput, naluara ukioq naatinnagu qanoq inerneqarumaarnersoq, Juliane Henningsen naggasiivoq.
Ilisimatusarnermut Ministeri Helge Sander ulloq manna tikillugu issittumi ilisimatusarnermut suliniarneq millisarneqanngitsoq oqaatigiuarsimavaa, tapiissutimmi amerliartuinnarput.
- Atuakkat assit allallu issittumut tunngasut poortorneqarnissaat ilisimatuut namminneq aalajangeeqataaffigaat, imaanngilaq isertorluni taamaaliortoqartoq, Helge Sander nassuiaavoq.
