Qilaatersornermik ilinniarnissaq 27-nik ukiulimmut Helene Nadummut pingaaruteqartupilussuuvoq. Assi: Privat

Helene Naduk arnanilu qilaatersortarpoq: Qanilaarneq misigisarpara

Qilaatersorneq tunissutaavoq ingerlateqqitassaq. Helene Naduk Kavigak Munck Tivolimi qilaatersornermik ataasinngormat takutitsisoq taama isumaqarpoq.

Helene Naduk Kavigak Munckip ilaquttami avanersuarmiut inngerutaanik atuinerani qilaatip katuarpalaarnera timaalu akuttoqatigiissumik aalapput qisuararlu avioorutaa inuaasa akornannippoq. 

Arnaa Gaz Zaa Lung Qaanaameersoq saniani qilaatersorpoq.

Helene Naduk Kavigaq Munck 27-nik ukiulik ileqqutoqqat malillugit qilaatersornermik ilinniarpoq. Taanna arnanilu Tivolimi naapinnermi ippassaq ukiut aappassaat takutitsipput.

AAMMA ATUARUK Inspirationspris i Canada går til strubesang og trommedans

- Qilaatersoraangama qamuuna eqqissisarpunga Ilaquttakka siuaasakkalu qanillisutut ittarpakka. Kalaaliussusera Kalaallillu Nunaanut ilaquttannullu atanera annertunerulertarpoq, Helene Naduk Kavigaq Munck Danmarkimi perioriartortoq taama oqaluttuarpoq. 

Ileqqutoqqat ingerlateqqippai

Kristumiussuseq nunasiaataanerlu eqqunneqarmata, nunatta kitaani ukiorpassuarni qilaatersortoqartanngilaq. Ileqqorli nunatta avannarpiaani kangianilu kinguaariinnit ingerlateqqinneqartarpoq.

Helene Naduk Kavigak Munckip arnaa Gaz Zaa Lung 25-nik ukioqarluni qilaatersorluni saqqummertalerpoq. Taamaammat marluullutik qilaatersorlutik saqqummertalernerat pissusissamisoorpoq.

Helene Naduk Kavigak Munckip anaanani qilaatersornerluni takutitsiartoraanga meeraagallaramili ilagisarpaa, ileqqullu ingerlateqqinnissaa pingaartillgu.

2017-imi qilaatersortut uani takusinnaavat.

Inngernerillu tamaasa inngerutit kimittoraluttuinnartutut ittarput. Anaanamisulli inngerutinik atuisinnaalernissamint piumassusaa annerulertarluni.

- Qilaatersorneq Kalaallit Nunaanni inuppassuarnut pingaaruteqarpoq, taamaammat pingaarteqaara sapinngisaralu naapertorlugu ingerlateqqinniarpara uannut tunissutaammat annertooq, Helene Naduk Kavigaq Munck oqarpoq nangillunilu:

- Avannaata kulturittalu nittarsaannerat aamma pingaaruteqarpoq, Kalallit Nunaata sinneranut sanilliulluta ikinnerussuteqaratta.

Unescomi ilaasoq

Qilaatersornermi periutsit aalajangersimaqqissaartut akunnerpassuit atorlugit ilinniarneqartarput, Helene Naduk Kavigak Munckilli asuliinnaq piffissartorfiginngilaa.

- Kulturi tammannginniassammat attattuarnissaa pingaaruteqarpoq. 

AAMMA ATUARUK Ajoqersuiartortitat inerteqqutigisimasaat nunarsuarmi kingornussatut inissinneqarneq: Qilaatersorneq kulturikkut kingornussatut asseqanngitsutut UNESCO-miit naqissuserneqarpoq

Qilaatersortarneq UNESCO-p nunarsuarmi kulturikkut kingornussat tigussaanngitsut allattorsimaffiannut inunnut inuiaqatigiinnullu pingaarutilittut nalilerneqarlni decembarimi 2021-mi ilanngunneqarpoq..

Taamaalilluni Kalaallit Nunaat naalagaaffeqatigiinni nunani siullersaalluni kulturikkut kingornussat tigussaanngutsut allattorsimaffianni allassimaffimmut ilanngutitsivoq.

- Tamanna ersinngitsup piumasaatut oqaatigisariaqarnerpoq, tassami ukioq manna 2021 tassaavoq ukiut 300-it matuma siornatigut kristumiuussutsip eqqunneqarneraniit qilaatersornerup akiorneqarluni nunatta kitaani tammariartulerluni nungutinneqarnerata aallartiffia, Nunatta katersugaasiviata pisortaa Daniel Thorleifsen taamani taama allappoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl