Hedegaard: Silaannaap allanngoriartornera pillugu Bush-ip isumaa allanngorpoq

Connie Hedegaard oqarpoq USA-p præsidentiata Bush-ip avatangiisit pillugit oqaatigisartagai qaammatine kingullerni allannguuteqarsimagaluartut. Maannakkulli avatangiisinut ministerit Montrealimi naapeqqinnissaannut qilanaarnerarpoq.

Asiami nunanik qaammatini kingullerni ataatsimeeqateqarnerminut atatillugu USAp præsidentia nassuernikuugaluarpoq mingutsitsinerup kingunerisaanut massakkut iliuuseqartoqartariaqarnerarlugu.

Kisiannili USAmiit taamatut saqqummiussisoqarnera nutaarsiassartaqanngitsutulluunniit oqaatigisariaqarpoq, Connie Hedegaard Radioaviisimut oqarpoq. Præsident Bushilli qaammatini kingullerni saqqummiussisarnera aallaavigissagaanni neriunartoqarnerarpaa.

Anguniagassat qulit suliarineqarneri nuannaarutigeqaa, malugisinnaanerarpaalu ullumikkut nikeriartoqarnerusoq sukkanerusumillu nikeriartoqalersoq, pingaartumik ukiup ataatsip matuma siornanut sanilliullugu.

Silaannaap allanngoriartorneranut inuiaqatigiissuit tamarmik peqataatinneqarnerulissapput. Avatangiisit allanngoriartornerat qaangiunnavianngilaq, taamaammat innuttaasut annertunerusumik tusagaqartarnissartik sillimmaffigiinnartariaqarpaat.

Aammali politikerit aalajangersimanerusumik anguniagaqartariaqarput, uninngaannarneq tamatta qimattariaqarparput, Connie Hedegaard peqataasunit qeratanngitsumik ingerlatsilluarnerminik nersualaarneqartoq oqarpoq.

Teknologiikkut ineriartortitat siammarterneqarnissaannut anguniagaqarneq Connie Hedegaardip aamma nuannaarutigaa.