Headley USA-p isertortumik kilitsissiarisimavaa
Peqqarniisaarniartutut pasineqartup illersuisua taama isumaqarpoq. Tassami uppernarsaatissat arlallit tikkuussimmata Amerikami oqartussaasunit Headley-p ilaatigut Danmarkimit Indiamullu pasinarsinnaasumik angalasarneri akuerineqartarsimasut, Danmarkip Radioa taama tusagassiivoq.
Mumbai 2008-mi, peqqarniisaarniat saassussinerinit tulleriiaanit inuit 174-it toqutaapput USA-milu unnerluussisussaatitaasut oqarnerat malillugu saassussinissat taakkua pilersaarusiorneranni David Headley peqataasarsimalluni Amerikamiullu isumaqarput JP Politikens Husimut saassussinissaq pilersaarusiorsimamagaluaraa.
Oqartussaasut taamatut ulorianartorsiortitsisumik pissusilersorneq paasisinnaappassuk tamanna pissuteqarpoq David Headley Amerikamiunit qanimut malittarineqarsimammat, tassami taanna taakkununnga ukiorpaalussuarni kilitsissiaasimavoq tusarfiillu Berlingske Tidendep oqaluussai malillugit illersuisut maanna suleqatigiinneq Headley-p tigusarineqarnissaata tungaanut pisimasoq uppernarsiniartussanngorlugu.
Amerikami politiit ikiaroornartulerisut uppernarsareerpaat David Headley 1988-imi kingornalu 1999-imi ikiaroornartumik eqqusseriartutut tigusarineqarami isertortumik kilitsissiatut akilerneqarluni suleqataarusulluni akuersisimasoq. Taamaattumillu tusarfiit malillugit Headley-p Indiamut Danmarkimullu angalasarnerpassui USA-p ilisimasimanngippagit tamanna eqqarsaatigineqarsinnaanngilluinnarpoq, tassami ikiaroornartoq pillugu eqqartuussaasimasut oqartussaasunik suleqateqarsimanertik pissutigalugu siusinaartumik iperagaasimasut akuerineqaqqaartinnatik nuna qimassinnaanngimmassuk.
Indiami isertortumik paasiniaasartuniit tusarfinnit aammattaaq Amerikamiut oktobarimi tigusarinninneq tikivillugu Headley-mik suleqateqarsimanerminnik pasillerneqarput, Indiallu piumasaralugu Mumbai-imi saassussinerit pillugit killisiuisoqarnissaanut tunngatillugu Headley tunniunneqassasoq, Amerikamili unnerluussisussaatitaasut Headley-p CIA-mit kilitsissiatut atorneqarsimanera tunniunneqarnissaalu akueriumanngilaat, USA-p nammineq taanna inatsisitigut malersorniarmagu.
Headley-p eqqartuunneqarnerani aallarnisaataasumik ataatsimiinnerit sap. akunnerani uani nangeqqinneqassapput, eqqartuussinivilli ukiup ataatsip ingerlanerani aatsaat aallartinneqassasoq ilimagineqarluni.
