H.C.Hansen kilitsissiaasimagunarpoq

H.C. Hansen tassaavoq USA-p isortortumik Pituffimmi sakkunik atomitalinnik inissiisinnaanerannik akuersisimasoq, taamaammallu USA-p kilitsissiarisimasaatut maanna oqaatigineqarnera Kalaallit Nunaannut soqutiginaateqarpoq. Ilisimatusaatigalugu nalunaarusiamik suliarinnittuuvoq, oqaluttuarisaaneq pillugu ilisimatooq, Peer Henrik Hansen.

H.C. Hanseni kilitsissiaasimasutut taassallugu suli paasisimasakippallaaraluarluta, oqartariaqarpunga Amerikamiut H.C: Hansenimut atassuteqarnertik ima pingaartitsigisimagaat allaat tamanna isertuuttariaqakkatut isigisimallugu, Peer Henrik Hansen oqarpoq. Paasissutissanik ingerlatitseqqittarsimanersoq suli uppernarsaatissaqartinngikkaluarlutigu, nalunngilarput pissutsinut susassarinngilluinnakkaminut akuliuttarsimasoq, soorlu Danmarkimi kilitsissiaqarfiit, PET-p FET-llu Amerikamiut kilitsissiaqarfiinut atatillugu suliaannut akuliuttarsimavoq.

Taamani pissutsit kingumut qiviaraanni naluneqanngilaq sorsunnersuup kinguninngua naalagaaffiit siunissami qanoq pisoqarnissaa pissanngatigeqigaat. Soorlu qanoq Tysklandip ineriartulernera, Ruslandimilu susoqarnera paasisimasaqarfiginnginnera eqqarsaatigalugit. Taamanimi naluarput Ruland iligissanerlugu akerarissanerluguluunniit, Peer Henrik Hansen oqarpoq. Danmarki taamani sanngiitsorujussuuvoq imminullu illersoriarsinnaanani taamaammallu pissaanilinnik soorlu Amerikamiunik suleqateqarniarneq, pilersaarutaannullu paasinninniarneq pingaaruteqartupilussuuinnarani aamma Amerikamiut Danmarkimi pissutsinik soqutiginninnissaat kissaatiginartinneqarluni.

- Taamaammallu isumaqarpunga Amerikamiut Danmarkimik ikiuinninnissaat kissaatigalugu H.C. Hansenip Amerikamiut ikiortarsimagai, Peer Henrik Hansen oqarpoq.

H.C. Hansenip Amerkamiut Pituffimmi sakkutooqarfimmi sakkunik atomitalinnik inissiinissaat 1957-imi akueraa. TV2-miillu Peer Henrik Hansen aperineqarpoq, paasisat nutaat takussutissaaersut sooq H.C. Hansenip Amerikamiut sakkunik atomitalinnik Kalaallit Nunaannut inissiiniarnerat akuerisimaneraa.