H.C. Andersenip allagai atuarneqarsinnaanngussapput
HC Andersenip oqaluttualiai amerlanernit ilisimaneqarput. Atuakkiortuali ilisarisimaneqarluarpa? Sapigai, imminut pikkuginera, artorsaatai angujumasaalu amerlanerit nalugunanngilaat. Oqaluttualiullammalli kiap ilisimaqarluarfigivaa?
Anorsaaq nillertoq Danmarkimi pisarnermisut anoraavoq, nunaqqatimalu qitsererarpaannga tullaataralungalu... HC andersenip ikinngutiminut Henriette Wolfimut aprilimi 1843-mi ullulerneqarsimasuni Parisimiit allagaanni ilaatigut taamatut imaqarput, tassa taallami ilungersuumminartuliami; Agnetha angullu qungussutariaq, nunaqqataasa atuakkianik naliliisartuinit ajortumik nalilerneqareersorlu ikinngutiminut allaaserisaqarnera taamatut tunuliaqutaqarpoq.
Qanga allakkat atuakkiortorsuup allagarisimasaasa amerlanersaat Odensemi katersugaasivik HC Andersenimullu tunngasunik katersugaasivik suleqatigiillutik tallimanngorpat internettimut saqqummiussuutissavaat, allagarisimasaasalu sinneri kingusinnerusukkut aamma saqqummiussuunneqalersaarput.
Saqqummiunneqartussat 20 procentii siornatigut saqqummiunneqarsimanngisaannartuupput, atuarneqarsinnaasimanatillu: Illit uiuvutit, nuliallu qanortoq guutip pilluaqqulisi, qangaanerusoq nuliartaarusunnikuugaluarpunga, uangali taamatut aqqusaagaqartussaasimanngilanga, kisiannili oqaluttualiorsinnaaneq qujamasuutigeqisannik pigilersimavara, HC Andersen, atuakkiaminik USA-mi saqqummiussisartuanut sunaaffa tigummigut kræfterluni toqujartornermini inuulluaqqusilluni allagai ilaatigut taama imaqarput. HC Andersenip illuani nakkutilliisuuneq Ejnar stig Asgaard taama oqaluttuarpoq.
