Hawaii-mut angalasussanngorput
Meeqqeriviatsialammik pilersitsinissamut atatillugu Namminersornerullutik Oqartussat Hawaiimut paasisassarsiortitsisussanngorput. Hawaiimi meeqqerivinnut paasisassarsiorneq; inatsisiliornermik malittarisassiornermik, ineriartortitsinermut ilinniartitsinermullu atortussiornermik kiisalu sulisunik ilinniartitseqqiisarnermik aallaaveqartinneqarpoq.
Meeqqanik perorsaanermut tunngasunik sammisaqarlutillu suliaqartut Nunatsinni inunnik isumaginnittunngorniarfimmeersut Pisortaqarfimmeersullu katillutik arfineq marluk, taakkulu saniatigut Inatsisartuni qinikkat marluk; Inuit Ataqatigiinneersoq Juliane Henningsen aamma Demokraatineersoq Jens B. Frederiksen kiisalu Ilinniartitaanermut Naalakkersuisoq Tommy Marø, qaammatip matuma arfineq pingajuanniit 20-at ilanngullugu Manerassuarmi qeqertamut USA-p naalagaaffianut atasumut Hawaiimut angalasussanngorput.
Nunatsinni perorsaaneq kitaamiut tassa danskiunerusut ileqquinik pingaartitaannillu tungaveqartinneqartorujussuuvoq, Hawaiimullu angalanermi kulturit marluk assigiinngitsut meeqqanut qanoq pingaaruteqartiginerat paasiniarneqassaaq.
Hawaiimut angalanermi sumiiffiit marluk paasisassarsiorfigineqassapput, tassalu qeqertami Hilomi sulissivik nunatsinni inerisaavinnut assersuunneqarsinnaasoq, meeqqanulli atualersussanut oqaasilerinermik sammisaqarfiusoq, kiisalu Hawaii ilisimatusarfimmut atasoq Mänuami meeqqanut sullissivik meeqqerisunngorniarfiuutigisoq paasisassarsiorfigineqassapput.
Meeqqerivitsialammut atatillugu Hawaiimut paasisassarsiornissaq 231.000 koruunit missaanni aningaasartuutigineqassaaq, aningaasartuutillu aningaasanut inatsimmmi Meeqqerivitsialammut kontomit matussuserneqassapput. Tamatuma saniatigut Inatsisartuni ilaasortat marluk Naalakkersuisunilu ilaasortap ataatsip peqataanerat 99.000 koruunit missaanni naleqartoq Inatsisartut angalanermut kontoannit aningaasaliiffigineqarpoq.
