VIDEO Hashitorsimanermik misiligut politikerit akerlerigaat – ilinniartut tapersersoraat
Ikiaroornartunik misiligut ilinniartoqarfinnut kollegianullu atuutilernissaanik siunnersuut siullermeerlugu tallimanngormat oqaluuserineqarmat akerlerineqangaatsiarpoq.
Ilinniartunit misiligutissamik quisitsisarnissaq ilinniartitaanermut, Kultureqarnermut, Ilisimatusarnermut Ilageeqarnermullu naalakkersuisumit Nivi Olsenimit (Demokraatit) saqqummiunneqarpoq.
- Isumaqarpunga siunnersuut kanngusaarinerusoq, Naaja Nathanielsen, attaviitsoq, Inuit Ataqatigiinninngaanniit ilaasortaajunnaareerluni KNR-imut oqarpoq.
- Kanngunarsaannerunngilaq. Kisianni tunngavissaqarluni aalajangiisinnaanermut inatsit periarfissiissoq, Nivi Olsen isumaqarpoq.
Akerlerineqarnera naalakkersuisup tupaallaatigaa
Inatsisartut oqallinneranni ilinniartut pinerluttutut isigineqalernissaat ernumassutigineqarpoq.
- Tupigivara Inatsisartuni tapersersorneqannginnama, Nivi Olsen oqarpoq.
Siunnersuut pillugu ilinniartut ilaat aperiganni tapersersuisut amerlapput.
- Ajorinngilara, isumaqarpunga piffissanngortoq, Najaaraq Johansen oqarpoq.
- Iliuuseqartoqartoq ajunngilaq, Pilutannguaq Kloster-Geisler oqarpoq.
Aamma atuaruk Pinngitsaaliissummik misiligutissamik quisitsisoqartassanngilaq
Aamma atuaruk GUX-ni ikiaroornartoq ajornartorsiutaanngilaq
Ilinniartitaanermut, Kultureqarnermut, Ilisimatusarnermut Ilageeqarnermullu naalakkersuisup ersarinnerusumik inatsiseqalernissaq ilaatigut kissaatigaa, assersuutigalugu ilinniartoq pasillerneqarneq pissutigalugu anisitaanissaa pinaveersaarniarlugu, inatsit massakkut atuuttoq malillugu anitsitsisoqarsinnaammat.
- Inatsisissatut siunnersuut nutaami imaakkami, misiligut hashitorsimasutut inerneqarpat ilinniartut anisitaaqqusaanngillat, Nivi Olsen oqarpoq.
Aamma atuaruk VIDEO Naalaganngorniaq: Quumik misissuinikkut hashimik atornerluineq qulaajaaffigineqarli
Naaja Nathanielsenili aanngajaarneq pinaveersaarniarlugu oqaloqatigiinnissaq orniginartinneruaa, siunnersuutigalugulu siunnersuut unitsinnissaa. Nivi Olsenili tunuartitsinianngilaq.
- Siunnersuut tunuartinnianngilara, Olsen erseqqissaavoq.
Inatsisissamik siunnersuut siullermeerneqareermat Inatsisinut Ataatsimiisitaliamut unnersuunneqarpoq.
Aamma atuaruk VIDEO Ikiaroornartuerniat Inatsisartunit ikilisinniarneqarput
Aamma atuaruk Ilinniagaqartut akornanni ikiaroornartumik atornerluineq eqqumaffigisariaqarpoq