Haship Nunatsinni ammaanneqarnissaa taperserneqanngilaq
Hashimik tuniniagaalluarnera politiit nukippassuit atorlugit akiorniartarpaat. Hashilu ammaanneqartuuppat nukiit taakku allanut atorneqarsinnaassagaluarput, taamaaliortoqassanngilarli.
Nunat allat hashimik ammaassinerisa assinganik Nunatsinni iliortoqarnissaanut piumassuseqartoqarnersoq paasiniarlugu aviisi AG partiit assigiinngitsut isumaannik misissuisimavoq.
Taperserneqarnerali annertugisassaanngilaq. Nunatsinni partiit anginersaata peqqissutsimut tunngatillugu oqaaseqartua AG-mut oqarpoq apeqqut taanna samminngisaannarsimallugu.
- Uanga tamanna isumaqarfiginngilara, aamma sammisaq taanna pillugu oqallinnermut peqataanngisaannarsimavunga. Aamma parteeqatikka sinnerlugit pqaaseqarsinnaanngilanga, qanoq isumaqarnersut ilisimannginnakku, Lars Matthæussen oqarpoq.
Mathæussenip siulittaasuata Aleqa Hammondip Inatsisartut ataatsimiinnerini aamma erseqqissaatigaa urani pinnagu hashimut akuersaanngilluinnartoqarnissaa kissaatiginerullugu.
Naalakkersuisooqatigiinni suleqataasup Atassutip aamma hashimik ammaassisoqarnissaa isumaqatiginngilluinnarpaa.
Illuatungiuliuttut Inuit Ataqatigiit aamma inatsisit allanngortitsisoqarnissaanik aamma pilersaaruteqanngillat, partiilli siulittaasuata Kuupik V. Kleistip erseqqissaatigaa nunarsuup sinnera qanoq pisoqarnersut alaatsinnaanneqartariaqartoq.
Nunatsinni partiit liberalertaata Demokraatit Nunatsinni haship ammaanneqarnissaa tapersernagu aamma erseqqissaatigaat.
- Nunat allat issuaannarlugit taamaaliortoqarnissaa takujuminaatsippara. Arlaatigut iliuuseqannginnerani iluaqutissartai ajoqutissartaalu sukumiisumik misissoqqaartariaqarpagut kingunerisinnaasaalu qularnaatsumik paaseqqaarlutigit, Anda Uldum, Inatsisartut peqqissutsimut ataatsimiititaliaani ilaasortaq aviisimut AG-mut taama oqarpoq.
