Hashimut pilersaarut kinguaattooqqasoq sulisunit amerlanernit suliarineqalertoq
Naalakkersuisoqarfiit hashimik akiuiniarnermut pilersaarutip immikkoortortaasa ilaanni kinguaattooqqasut peqqissutsimut naalakkersuisup nassuerutigaa.
Kingumut qiviarluni iliuuseriniakkanut piffissaliussat angusarissaarusuppallaarnermut ersiutaasut, maannali aaqqiisoqarsimasoq, peqqissutsimut naalakkersuisoqarfik KNR-imut e-mailikkut allappoq.
Hashimut akiuiniarnermut pilersaarummi iliuusissat 25-upput. Iliuusissat aqqaneq-marluk aallarteriinngikkunik naammassineqareerput, pingasullu aappaagu aallartittussatut pilersaarutaapput.
AAMMA ATUARUK Pilersaarut ingerlavoq innuttaasulli peqataatinneqassapput
Iliuusissalli qulit suli aallartinngillat. Taakku kinguaattoorsimanngikkunik taamaatiinnarneqarput.
Peqqissutsimullu tunngasuni iliuusissat arfinillit kinguaattooqapput, atornerluineq pillugu inatsisiliornissaq, 2018-imut kinguartinneqartoq, paasititsiniaanermullu iliuusissat pingasuusut taakkunani ilaallutik.
Ilinniarfinni kollegianilu ikiaroornartumik atuisoqarsimaneranik misissuisarnissamut siunnersuut Inatsisartunit taperserneqanngimmat tunuartinneqarpoq.
Inatsisinut atuutsitsinermut tunngasuni iliuusissat pingasuusut suli aallartinngitsut, inatsisinut atuutsitsinermut naalakkersuisoqarfiup KNR-imut ilisimatitsissutigereerpaa.
AAMMA ATUARUK Qeqqata meerartai hashimik atornerluinermit eqqugaaqqasut
Iliuusissatullu pilersaarummi immikkoortut ilaat kinguaattooqqasut, peqqissutsimut naalakkersuisoqarfiup nassuerutigaa. Iliuusissat piffissaliunneqartumi naammassinissaannut naammattumik sulisussaqarsimanngitsoq nassuiaatigineqarpoq.
- Tamanna maanna aaqqiivigineqareerpoq, hashimullu suliap pisariaqartumik naammassisaqarfiuartuaarnissaa qulakkeerniarlugu sulisunit amerlanernit suliaritinneqalereerpoq, naalakkersuisoqarfik allappoq.
AAMMA ATUARUK Hashi ikiorneqannginnerlu Qeqqata Kommuniani meeqqanut atugarliortitsisut
Naalakkersuisoqarfik pilersaarutip saniatigut haship inunnut ajoqutai pillugit KNR-ikkut inuillu internettikkut attaveqaqatigiittarfiitigut qaammarsaaniarpoq.
Akileraartarnermik aqutsisoqarfimmit iliuusissatik sisamaasut, tassalu mittarfinni nakkutilliineruneq, timimut scannerummik pisineq, ikiaroornartumik suussusersiniarnermut atortussanik pitsaanerusunik pisineq akitsuuserisullu angalanerunissaat tamaasa naammassereeritik KNR-imut paasissutissiissutigaat.
AAMMA ATUARUK Ikiaroorunnaarniaritsi
