Hashimik tigummiaqarneq inerteqqutinngortariaqarsoraat
Imigassaq Ikiaroornartorlu pillugit Siunnersuisooqatigiit januaarip aqqarnanni ataatsimiinnerminni nunatsinni imigassartalinnik ikiaroornartumillu atuinermut tunngasunik arlalinnik siunnersuuteqarput.
Imigassat kimittuut nalinginnaasumik tuniniagaammata, sodavandit imigassanik kimittuunik akusat tuniniagaanerisa unitsinneqarnissaat Siunnersuisoqatigiit orniginartinngilaat. Taamaattorli inuiaqatigiinnut paasisitsiniaaneq annertunerusoq imigassanillu tamakkuninnga akitsuusersuineq pinaveersaartitsinermut aqqutaalluarsinnaasut Siunnersuisoqatigiit isumaqarput. Ikioraarnartumut hashimut tunngatillugu Siunnersuisoqatigiit inassutigaat hashimik tigummiaqarneq, namminerluunnit atugassamik tigummiaqartarneq inerteqqutinngortariaqartut. Taamattaaq meeqqat ilaasa ikiaroornartumik hashimik tuniniaanermi akuutinneqartarnerat Siunnersuisoqatigiit ataatsimiinnerminni eqqartorsimavaat, tassanilu meeqqat akuutinneqartut paasineqarpat politiit isumaginnittoqarfiullu suliami piaartumik akuliutsinneqartarnissaat, Siunnersuisoqatigiinnit inassutigineqarpoq, piaartumik akuliutsitsinikkut meeqqat annertuumik innarlernissaat pinaveersaartinniarlugu. Siunnersuisoqatigiillu ikiaroornartumut hashimut pinaveersaartitsiniarluni iliuusissatut pilersaarutip siorna juunimi saqqummiunneqartup qanoq atorneqarnissaa ingerlanneqarnissaalu ataatsimiinnermi aamma nalilersoraat, siulersuisut ilisimatitsipput.
Imigassaq Ikiaroornartorlu Pillugit Siunnersuisoqatigiit ataatsimiinnerminni aamma siulittaasumik tullersortaanillu nutaanik qinersipput. Siulittaasunngorpoq peqqinnissaqarfimmik nakkutilliisoq Knud Brinkløv Jensen, siulittaasumullu tullinngorluni KIK-ip siulittaasua Naja Jessen Nowack.
