Hashimik eqqussuisimasutut pineqaatissinneqarpoq

Nuummi politiit hashimik paasiniaasartut aningaasat 316.000 koruunit kuffertimi nassaaraat, akitsuuserisut peqatigalugit Nuummi mittarfimmi decembarip ulluisa aqqaneq-aappaanni 2008-mi pisarneq naapertorlugu misissuinerminni. Sermitsiaq nittartakkamini taama allaaserinnippoq.
Allattoq Mads Lynge
januaarip 12-at 2009 17:16

Angut, aningaasanik Kalaallit nunaannit annissiniartoq tigusarineqarami oqaluttuarpoq aningaasat suminngaanniit pissarsiarisimanerlugit, politiillu suliassamut attuumassuteqartut pingasut allat tigusaraat.

Angut pingaarnertut inissisimasoq, angut 40-nik ukiulik politiinit ilisimaneqarluartoq, hashimik 4 kiilumik eqqussisimasutut tuniniaasimasutullu ukioq ataaseq qaammatillu arfineq-pingasut pinerluuteqarsimasunut inissiisarfimmiittussanngortinneqarpoq.

Angut, aningaasanik annisseriaraluartoq qaammatini sisamani pinerluuteqarsimasunut inissiisarfimmiittussanngorlugu pineqaatissinneqarpoq.

Aappariit tamarmik 35-nik ukiullit, angut pinerlunnermi pingaarnertut inissisimasoq sinnerlugu hashimik aningaasanillu tigumminnissimasut, marluullutik qaammatini pingasuni pinerluuteqarsimasunut inissiisarfimmiittussanngortinneqarput.

– Suliamut atatillugu politiit aningaasat 316.000 koruunit hashilu 615 grammi, eqqunneqartup 4 kiilup sinnera, arsaarinnissutigaat, hashimik paasiniaasartut pisortaat Finn Jeppesen Sermitsiamut oqarpoq.