Hashimik anngiortumik eqqussuisut paasisaasut
Taakku Danmarkimit Aasiannut Nuummullu hashimik katillugit 5 kilomik ukiup aappaa avillugu anngiortumik eqqussuisimapput.
Ikiaroornartulerisut anngiortumik eqqunniagaat akileraaruserisunit ilaatigut paasineqartarsimapput, tamannalu tunngavigalugu ikiaroornartulerisut inuusuttut ilaat ataaseq Eqqartuussisoqarfik Sermersuumi sapaatit-akunnerata siuliani eqqartuunneqarpoq, aviisi Atuagagdliutit taama allaaserisaqarpoq.
Pineqaatissinneqarsimasunut inissiisarfimmiittussanngortinneqartoq
Anngiortumik eqqussuisut ilaata 25-nik ukiullip unnerluussummi unnerluussutinit tallimaasut ilaannai nassuerutigai, ukiumilu ataatsimi qaammatinilu qulini pineqaatissinneqarsimasunut inissiisarfimmiittussanngorlugu pineqaatissinneqarpoq, tamatumalu saniatigut aamma 160.000 koruunit arsaarinnissutigineqarput suliamilu aningaasartuutinik akiliisussanngortinneqarluni.
Angutip inuusuttup ulluni 14-ini eqqarsarfissaqarumalluni kissaatigisimavaa. Ikiaroornartulerinermut akuusut allat tallimat eqqartuussivimmut sassartinneqarnissartik suli utaqqivaat.