Hashimik 18 kiilumik nunatsinnut anngiortumik eqqussiniartutut pasineqartut: Pinngitsuunerarput

19-inik ukiulik, 34-nillu ukiulik Københavnip mittarfissuani tigusarineqarput. Taakku parnaarussivimmi ullumi tigummisassanngortinneqarput.
ikiaroornartoq Politi stoffer
Suliaq Særlig Efterforskning Vestimit paasiniaavigineqarpoq, taakku aaqqissuussamik pinerluttuliornernik killigititanik qaangiillutik pinerluttuliornernik paasiniaasartuupput. Assi © : KNR
Allattoq Ritzau
januaarip 17-at 2020 15:11
Nutserisoq Connie Fontain

Angutit marluk akunnerit tallimat inatsit tunngaviusoq naapertorlugu killisiorneqareerlutik hashimik anngiortumik eqqussuisutut kokainimillu tuniniaasutut parnaarussivimmi tallimanngornermi ualikkut tigummigallagassanngortinneqarput.

- Suliani assigiinngitsuni marlunni pasineqarput, immikkut ittumik unnerluussisussaatitaasoq, Lars Jørgen Petersen oqarpoq.

- Suliap aappaani Kalaallit Nunaannut hashimik 18 kiilumik anngiortumik eqqussuinermut tunngavoq, tassanga 3 kiilumik eqqusseriarnerulluni. Suliallu aappaa kokainimik 400 gramimit annikinnerunngitsumik Danmarkimi sumiinneranik ilisimaneqanngitsumi tuniniaasimanermut tunngalluni.

Angutit 19-inik 34-nillu ukiullit Københavnip mittarfissuani sisamanngornermi tigusariaqarput, Aarhusillu Eqqartuussiviani eqqartuussisumut tallimanngornermi sassartinneqarlutik.

AAMMA ATUARUK Angutit marluk hashimik nunatsinnut eqqussiniarsimasutut Aarhusimi eqqartuunneqartussanngortut

Angutit tamarmik pinngitsuunerarput, taamaakkaluartorli eqqartuussisup angutit sapaatini akunnerni sisamani parnaarussivimmi tigummineqarallartussanngortippai. Angutip aappaata aalajangiineq Venstre Landsretimut erngertumik nangitsitassanngortippaa aappaatalu nangitsisoqarsinnaanerarpaa.

Suliaq Særlig Efterforskning Vestimit paasiniaavigineqarpoq, taakku aaqqissuussamik pinerluttuliornernik killigititanik qaangiillutik pinerluttuliornernik paasiniaasartuupput.

Inatsit tunngaviusoq naapertorlugu tallimanngornermi killisiuineq matoqqasuutinneqarpoq, taamaammat Lars Jørgen Petersenip angutit taakku marluk politiinit qanoq paasineqarnerat oqaaseqarfigisinnaanngilaa.

Matut matoqqasuutinneqarnerat pissutigalugu angutit eqqartuussivimmi qanoq nassuiaateqarnerat aamma paasissutissiissutigineqanngilaq.