Hashimik 15 kiilumik eqqusseriarneq aqagu aalajangiivigineqassaaq
Ullumi ulloq tassaavoq uppernarsaasussanik killisiuinermik kingullermik ingerlatsiffik, angutip 33-nik ukiullip Nuummeersup aamma angutip 28-nik ukiulllip Danmarkimeersup hashimik 15 kiilumik Nuummut eqqusseriarsimanerat uppernarsiniarlugu.
28-nik ukiulik Aalborgiminngaannit poortukkamik fjernsynimik hashimik imalimmik nassitsisimasutut pasineqarpoq. Taannali pasillerneqarnerminut pinngitsuunerarpoq tamannalu nammineq Aalborgimiissimanngisaannarnerminik tunngavilersorlugu.
Nuummi politiit nassiussaq misissorpaat paasillugulu poortukkami hasheqartoq. Politiit tamatumunnga tulliullugu poortugaq aaneqartussanngormat alapernaappaat, angutillu 33-nik ukiullip, aammattaaq pasineqartup, Nuummeersullu ilisarisimasaata, aammagu alaatsinaallugu.
Angut poortukkamik aallersoq tamatuma kinguninnguatigut hashi 15 kiilu pillugu suliassami peqataasimanermini ukiup aappassaa avillugu pinerluuteqarsimasunut isertitsivimmiittussanngorlugu eqqartuunneqarpoq.
33-nik ukiulik 15 kiilut saniatigut hashimik 5 kiilunik tuniniaasimasutut pasineqarpoq.
Unnerluussisup allakkap unnerluussutip saqqummiunneqarnerani paasivaa pasineqartoq 33-nik ukiulik isertitsivimmiitilluni ineeqqamini mobiltelefoneqarsimasoq.
- Paasiniaanermi paasineqarpoq, 33-nik ukiullip mobilini isertortumik eqqunniassagamiuk, isertitsivimmi nakkutilliisoq akilersimagaa, unnerluussisoq Bjørn Bjerregaard eqqartuussinerup nalaani taama oqarpoq.
Politiit tamanna paasigamikku, pasisap allallu akornanni oqaloqatigiinnerit tusarnaartarlugit aallartippaat, tusarnaakkallu taakkua 33-nik ukiullip hashimut attuumassuteqarneranut amerlanerusunik uppernarsaatissiipput.
Pasisat marluusut hashimik 15 kiilunik eqqusseriarsimasutut pisuunersut eqqartuussivimmi aqagu nalunaaqutaq marlunut aalajangiivigineqassaaq.