Hashi nunatsinni qanoq atugaatiginersoq misissoqquaat

Ikiaroornartoq hash ajoqusiisinnaasoq, nunani allani misissuinerit kingulliit takutippaat.

- Hashi ilimagisatsinniit ajoqusiisinnaaneruvoq. Inuit ilaasa sianiutitigut napparsimalernerannik, soorlu takorluuinermik, inuttut kinaassusermik allanngortitsisalernermik assigisaanillu kiisalu nikallunganermik nappaateqalernermik pilersitsinnaasoq paasineqarpoq, naak ikiaroornartumik atuinngikkaanni taamatut napparsimalersussaanngikkaluartunik. Inatsisartuni Demokraatit sinnerlugit ilaasortat ilaat Astrid Flesicher Rex oqarpoq. Taamaattumik paasisat kingulliit tunngavigalugit Demokraatit piumasaraat Naalakkersuisut nuna tamakkerlugu innuttaasut ikiaroornartumik hash-imik atuinerat qulaajarniarlugu misissuinermik aallartitsissasut.

-Ajoraluartumik nunatsinni ikiaroornartumik hash-imik atornerluineq pillugu paasissutissanik nalunaarsuinernillu atorsinnaasatsinnik peqanngilagut. Tamanna ajuusaarnaqaaq – minnerunngitsumik paasisat kingulliit takutimmassuk, hashimik atuineq inuit ilaasa skizofreniimik, tassa sianiutitigut napparsimalernerannik kinguneqartartoq, Demokraatit oqarput, nangillutillu:

-Nalunaarsukkanik peqannginnitsinni ajornartorsiut annerpaaq tassa pinaveersaartitsinermik suliaqarniarneq qanoq ittoq aallartissallugu tikkuarsinnaannginnatsigu. Taamaammat Demokraatit piumasaraat Naalakkersuisoq akisussaasoq nuna tamakkerlugu innutaasut ikiaroornartumik hash-imik atuinerat qulaajarniarlugu misissuinermik aallartitsissasoq.

Tamatuma kingorna misissuinerup inerneri sapinngisamik piaarnerpaamik aalajangersimasunik siunertaqarluni pinaveersaartitsinermik suliarinninnermillu aallartitsinissamut atorsinnaalerniassammata.

- Demokraatit sinnerlugit ilaqutariinnermut peqqinnissamullu tunngatillugu oqaaseqartartutut erseqqissaatigissavara, tamanna imaannaanngitsorujussuartut isigigakku, Naalakkersuisullu aggusti aallartitsinnagu misissuinissamik suliniuteqarlutik aallartinngippata, Demokraatinit Inatsisartut ukiaanerani ataatsimiinnissaannut Naalakkersuisut misissuinissamik taamaattumik ingerlatsissaannut suliakkerneqarnissaannik siunnersuuteqarnissarput pilersaarutigaarput, Astrid Fleischer Rex oqarpoq.